Rossiyada harbiy vertolyot va samolyotlar birin-ketin qulamoqda (video)

Bugun, 13 may kuni Rossiyaning Bryansk viloyatida avvaliga Mi-8 vertolyoti, undan keyin esa Su-34 harbiy samolyoti halokatga uchradi. Bu haqda TASS xabar berdi. 

Ma’lum qilinishicha, viloyatning Klinsi tumani hududida vertolyot qulagan. Tarmoqlarda ushbu holat aks etgan videolar tarqalmoqda. Dastlabki ma’lumotlarga ko‘ra, hodisa oqibatida ikki kishi halok bo‘lgan. Tinch aholi orasida qurbonlar va jarohatlanganlar yo‘qligi ma’lum qilingan. Shu bilan birga ba’zi uylarga shikast yetgani aytilmoqda. 

Tasvirlardan ko‘rish mumkinki, vertolyot, avvaliga, osmonda portlagan. Shundan so‘ng yerga qulab, yong‘in kelib chiqqan. Yong‘in tez orada bartaraf qilingan. Qulagan vertolyotlar soni ikkita bo‘lishi mumkinligi ham taxmin qilinmoqda.

Voqeadan ko‘p o‘tmay viloyat hududida yana bir aviahalokat sodir bo‘lgan. Su-34 harbiy samolyoti qulab tushgan. Hodisa oqibatida uchuvchi va shturman halok bo‘lgani ma’lum qilingan.

Eslatib o‘tamiz, avvalroq Buyuk Britaniya Ukrainaga Rossiya hududiga ham zarba berishi mumkin bo‘lgan Storm Shadow raketalarini berishi haqida xabar berilgandi. Rossiya Tashqi ishlar vazirligi esa buni dushmanlik harakati deb baholagan.