Krivoy Rogdagi ko‘p qavatli uyga raketa tushdi

Rossiya Qurolli kuchlarining ballistik raketasi Krivoy Rogdagi ko‘p qavatli binoga kelib tushdi. Bu haqda bugun, 11 noyabr kuni shahar mudofaa kengashi raisi Aleksandr Vilkul ma’lum qildi.

Uning so‘zlariga ko‘ra, ushbu zarba oqibatida beshinchi qavatdan birinchi qavatgacha kirish joyi vayron bo‘lgan. Sakkiz kishi jarohatlangan.

O‘z navbatida, Dnepropetrovsk viloyati harbiy boshqarmasi rahbari Sergey Lisakning aniqlik kiritishicha, yaradorlar orasida o‘n yoshli qizcha ham bor, unga voqea joyida tibbiy yordam ko‘rsatilgan va 11 yoshli bola ham o‘rtacha og‘irlikdagi jarohat bilan shifoxonaga olib ketilgan. Bundan tashqari, 58 va 75 yoshli ayollar shifoxonaga yotqizilgan.

Ukraina Prezidenti Vladimir Zelenskiy o‘z tug‘ilgan shahriga uyushtirilgan hujumni izohlar ekan, shunday yozdi:

“Rossiya faqat urushni davom ettirishga intiladi va uning har bir zarbasi Rossiyaning diplomatiya haqidagi har qanday bayonotini rad etadi. Ukrainaga Rossiya terroridan himoyalanish uchun qurol kerak, diplomatiyani haqiqiy va kuchli qilish uchun esa kuchliroq tinchlik yordami kerak. Prinsipial qarorlarsiz va Ukrainaning kuchli qo‘llab-quvvatlovisiz Rossiya tinchlikka intilish maqsadiga ega bo‘lmaydi, faqat yangi maqsadlarni izlaydi”.

Eslatib o‘tamiz, 11 noyabrga o‘tar kechasi Rossiya kuchlari Ukrainaning qator hududlariga, xususan, Zaporoje va Nikolayevga havo zarbalari bergan, oqibatda 6 kishi halok bo‘lgandi.