Rossiya Markaziy Osiyoning mustaqilligini saqlash uchun Maslahat uchrashuviga qo‘shilmoqchi

Rossiya Markaziy Osiyo va Ozarbayjon davlat rahbarlari o‘rtasidagi Maslahat uchrashuvlari formatiga qo‘shilishni ko‘rib chiqish mantiqan to‘g‘ri deb hisoblaydi. Bu qadam muvofiqlashtirishni kuchaytirishga va yanada inklyuziv xavfsizlik arxitekturasini yaratishga yordam beradi. Bu haqda Rossiyaning Tojikistondagi elchixonasining birinchi kotibi Aleksey Zenko Dushanbeda bo‘lib o‘tgan “Markaziy Yevrosiyo davlatlari integratsiya jarayonida: ustuvorliklar, yaqinlashuv tabiati va imkoniyatlar” mavzusidagi xalqaro ilmiy konferensiyasida so‘zlagan nutqida aytib o‘tdi. 

Uning qayd etishicha, dunyoda keng ko‘lamli geosiyosiy o‘zgarishlar ro‘y bermoqda, ularning eng muhimlari Yevrosiyo makonida sodir bo‘lmoqda. Bu yangi ittifoqlar, xalqaro tashkilotlar va integratsiya birlashmalarini yaratish va mustahkamlashni o‘z ichiga oladi.

“Biz “Markaziy Osiyo beshligi” formatining rivojlanishini katta qiziqish bilan kuzatmoqdamiz. Ozarbayjonning “mintaqa davlat rahbarlarining” maslahat uchrashuvlariga qo‘shilish qarorini e’tirof etamiz. Rossiyaning Markaziy Osiyo mintaqasiga geografik va tarixiy yaqinligi, shuningdek, rivojlangan iqtisodiy va transport aloqalarini hisobga olgan holda, biz Rossiyani ushbu formatga qo‘shish imkoniyatini ko‘rib chiqish mantiqan to‘g‘ri, deb hisoblaymiz. Bu muvofiqlashtirishni kuchaytirishga, integratsiyani rivojlantirishga va mintaqa mamlakatlarining mustaqilligini saqlab qolish bilan birga yanada inklyuziv xavfsizlik arxitekturasini yaratishga yordam beradi”, deydi Zenko. 

Uning qo‘shimcha qilishicha, bu jarayonlar, shubhasiz, Markaziy Osiyoda va umuman Yevroosiyoda hamkorlik va xavfsizlikni mustahkamlashga hissa qo‘shadi. 

Joriy yilning noyabr oyida Ozarbayjon rahbari Ilhom Aliyev ilk bor ishtirok etgan Markaziy Osiyo davlat rahbarlarining yettinchi maslahat uchrashuvidan so‘ng, Bakuning ushbu formatda to‘liq ishtirok etishi to‘g‘risida qaror qabul qilindi. Mintaqa davlat rahbarlarining muntazam maslahat uchrashuvlarini o‘tkazish tashabbusi O‘zbekiston Prezidenti Shavkat Mirziyoyev tomonidan 2017 yil sentyabrida BMT Bosh Assambleyasining 72-sessiyasida ilgari surilgan edi. Birinchi bunday uchrashuv 2018 yil mart oyida Qozog‘istonda bo‘lib o‘tgan.