Rossiya Qora dengizdagi yuk kemasiga zarba berdi. Qurbonlar bor

Rossiya harbiylari Qora dengizda Ukrainaning Odessa sohillari yaqinida xalqaro yuk kemasiga zarba berishi oqibatida kamida 5 nafar ekipaj a’zosi halok bo‘ldi. Bu haqda Ukraina rasmiylari ma’lum qildi.

Ukraina Bosh vaziri Sergiy Koretskiyning aytishicha, Gvineya-Bisau bayrog‘i ostida qatnovchi kema portdan makkajo‘xori yuki bilan chiqib ketgan bo‘lgan. Kema ekipaji tarkibida Hindiston va Suriyaning 17 nafar fuqarosi, shuningdek, bir nafar Ukraina fuqarosi bo‘lgan. Uning so‘zlariga ko‘ra, sakkiz nafar ekipaj a’zosi qutqarib qolingan. Kemada yong‘in uzoq vaqt davom etgan bo‘lib, yana besh kishi bedarak yo‘qolgan.

Moskva hozircha ushbu hujum yuzasidan rasmiy izoh bermagan. Rossiya so‘nggi haftalarda Ukraina janubidagi chuqur suvli portlarga hujumlarni kuchaytirdi. Bu portlar mamlakatning don mahsulotlari va boshqa muhim yuklar eksportida asosiy ahamiyatga ega.

“Fuqarolik kemasi. Xalqaro ekipaj. Jahon oziq-ovqat xavfsizligiga xizmat qiluvchi yo‘nalish. Putin yana bir nishonni ko‘rdi. Bu hujum hech qanday xayolga o‘rin qoldirmaydi. Putin Rossiyasi kimni o‘ldirishiga ahamiyat bermaydi”, deb yozgan Ukraina Tashqi ishlar vaziri vazifasini bajaruvchi Andrey Sibiga X ijtimoiy tarmog‘ida Rossiya prezidenti Vladimir Putinga ishora qilib.

Eslatib o‘tamiz, 18 iyul kuni ham Rossiya Odessa port infratuzilmasiga hujum qilib, Antigua va Barbuda bayrog‘i ostidagi kemaga zarba bergani oqibatida bir kishi halok bo‘lgan edi. Undan bir kun avval esa Rossiyaning Odessa va Nikolayev shaharlariga bergan zarbalari natijasida 3 kishi halok bo‘lgan.