Rossiya BMT Xavfsizlik Kengashi rezolyutsiyasiga veto qo‘ydi

Rossiya BMT Xavfsizlik Kengashining Shimoliy Koreya bo‘yicha sanksiyalar qo‘mitasi ekspertlarining mandatini bir yilga uzaytirish bo‘yicha AQSH tomonidan tayyorlangan rezolyutsiya loyihasiga veto qo‘ydi. Bu haqda RIA Novosti xabar berdi.
Xitoy ovoz berishda betaraf qoldi. BMT Xavfsizlik Kengashining qolgan a’zolari rezolyutsiyani ma’qulladi.

Hujjat matnida aytilishicha, BMT Xavfsizlik Kengashi “ekspertlar guruhining mandatini 2025 yil 30 aprelgacha uzaytirishga qaror qiladi”.

Rossiya Federatsiyasining BMTdagi doimiy vakili Vasiliy Nebenzya Moskva KXDRga qarshi sanksiyalar rejimini yangilash jarayoni BMT Xavfsizlik Kengashida allaqachon kechikib qolganiga ishonch hosil qilganini ta’kidlagan. Uning so‘zlariga ko‘ra, G‘arb davlatlari KXDRga nisbatan o‘zlarining buzg‘unchi va jazolovchi mantiqlaridan uzoqlashmoqchi emas.

"Ushbu halokatli vaziyatning quroli 1718 ekspertlar guruhi bo‘lib, u o‘zining bevosita majburiyatlarini bajarishni to‘xtatdi. Uning ishi g‘arb yondashuvlari bilan o‘ynash, noxolis ma’lumotni qayta chop etish, gazeta sarlavhalari va past sifatli fotosuratlarni tahlil qilishgacha tusha boshladi. Shunday qilib, guruh sanksiyalar rejimining holatini oqilona baholashga qodir emasligini tan oladi. Panel yarim orol muammolariga mos kelmaydigan ahamiyatsiz tafsilotlarga yopishib olishda davom etdi”, deydi Rossiya vakili. 

Ma’lumot uchun, 1718-sonli rezolyutsiya 2006 yil oktyabr oyida Shimoliy Koreyaning yadroviy sinoviga javoban qabul qilingan. Shu orqali KXDRga har qanday harbiy texnika va qurollarni, shuningdek, Shimoliy Koreyaning ommaviy qirg‘in qurollarini yaratish dasturlarida qo‘llanilishi mumkin bo‘lgan materiallar, jihozlar, tovarlar va texnologiyalarni yetkazib berish, sotish yoki berishga taqiq qo‘yilgan. Shundan so‘ng BMT Xavfsizlik Kengashi Shimoliy Koreyaga qarshi sanksiyalarni kuchaytiruvchi bir qator rezolyutsiyalarni qabul qildi. Sanksiyalar qo‘mitasi esa Xavfsizlik Kengashi tomonidan kiritilgan sanksiyalarga rioya etilishini nazorat qilish uchun tuzilgan.

Eslatib o‘tamiz, o‘tgan yilning sentyabr oyida Shimoliy Koreya yetakchisi Kim Chen Inning Rossiyaga safari chog‘idagi uchrashuvlar orasida Rossiya Tashqi ishlar vaziri Sergey Lavrov BMT Xavfsizlik Kengashida Rossiya va Xitoy KXDRga qarshi sanksiya joriy qilinishiga yo‘l qo‘ymasligini bildirgandi. Kecha, 27 mart kuni esa AQSH Rossiya, Xitoy va Birlashgan Arab Amirliklarida joylashgan olti nafar shaxs va ikki kompaniyani Shimoliy Koreyaning qurol-yarog‘ dasturiga mablag‘ o‘tkazishda ayblab, “qora ro‘yxat”ga kiritdi.