“Real Madrid” yulduzi terma jamoasidagi faoliyatini yakunladi

“Real Madrid” himoyachisi Antonio Ryudiger Germaniya terma jamoasi safidagi faoliyatini yakunladi. Bu haqda futbolchi Instagram sahifasida ma’lum qildi.

33 yoshli futbolchi terma jamoa tarkibida 86 ta uchrashuvda maydonga tushgan. Ryudiger ijtimoiy tarmoqlarda qoldirgan ta’sirli murojaatida bir muddat o‘ylab ko‘rganidan so‘ng xalqaro faoliyatini yakunlashga qaror qilganini ma’lum qildi. U bu qarorini yosh avlodga yo‘l ochish istagi bilan izohlagan.

Ryudiger Germaniya terma jamoasida 2014 yilda debyut qilgan. U milliy jamoa safida 86 ta o‘yin o‘tkazib, 3 ta gol urgan.

Futbolchining bu qarori Jahon chempionatidan keyin boshlangan jarayonga nuqta qo‘ydi. Germaniya terma jamoasi turnirda Paragvaydan mag‘lubiyatga uchraganidan so‘ng, Ryudiger kiyinish xonasida jamoadoshlariga terma jamoadagi faoliyatini yakunlaganini aytgani haqida xabarlar tarqalgan edi. Biroq Yurgen Kloppning Germaniya terma jamoasi bosh murabbiyi etib tayinlanishi futbolchini yakuniy qaror qabul qilishdan oldin yana bir bor o‘ylab ko‘rishga undagan.

Ryudiger endi e’tiborini to‘liq klubi – “Real Madrid”ga qaratishini ta’kidladi. Himoyachi joriy yilning iyun oyida madridliklar bilan shartnomasini 2027 yilga qadar uzaytirgandi.

Eslatib o‘tamiz, avvalroq argentinalik futbol yulduzi Lionel Messi ham terma jamoasidagi faoliyatini yakunlaganini e’lon qilgandi.