“Real” eshiklari Mbappe uchun shu yozda ochilmaydi

Fransiyaning PSJ klubi hujumchisi Kilian Mbappe shu yozgi transfer oynasida Ispaniyaning “Real” klubiga o‘tmaydi. Bu haqda “Marca” xabar berdi.

Manbaga ko‘ra, u “qaymoqranglilar”ning mavsum oralig‘ida tarkibni kuchaytirish rejalariga kiritilmagan. Ispaniya klubi 24 yoshli futbolchi bilan 2024 yilning yanvarida – uning PSJ bilan kelishuvi tugashiga olti oy qolganda shartnoma imzolash variantini ko‘rib chiqadi. 

Ta’kidlash joiz, iyun oyining ikkinchi yarmida Kilianning qirollik klubiga o‘tishi bilan bog‘liq xabarlar ko‘payib qoldi, biroq “Real Madrid” fransiyalik futbolchini shu yozda o‘z safiga qo‘shib olish bo‘yicha hech qanday muzokara o‘tkazmagan.

Mbappe PSJga 2017 yilning yozida kelib qo‘shilgan. O‘tgan mavsumda hujumchi 43 o‘yinda 41 ta gol urdi va 10 ta golli uzatmani amalga oshirdi. Mbappe “Real”ga 2022 yilning yozida o‘tishi mumkin edi, biroq fransiyalik futbolchi PSJ bilan shartnomani uzaytirishga qaror qildi.