Rasman: Shohasan Mirzamatov va Hamzat Chapanovning jangi tasdiqlandi

O‘zbekistonlik MMA ustasi Shohasan Mirzmatov navbatdagi jangini MPLda Rossiya vakili Hamzat Chapanovga qarshi o‘tkazadi. Bu xabarni promoushen mas’ullari rasman tasdiqladi. 

Unga ko‘ra, o‘zbekistonlik UFC jangchisi Mahmud Murodovga tegishli bo‘lgan liga joriy yilning 16 sentyabr kuni Toshkent shahrida navbatdagi turnirini o‘tkazadi. Uning markaziy jangida esa aynan Shohasan Mirzmatov va Hamzat Chapanov o‘zaro to‘qnash keladi.

Ma’lumot uchun, Shohasan Mirzamatov faoliyati davomida jami 12 ta jangda qatnashib, ularning 10 tasida qo‘li baland kelgan va 2 marta mag‘lubiyatga uchragan. U oxirgi jangini joriy yilning 22 iyul sanasida eronlik raqibi Azadi-Farga qarshi o‘tkazib, birinchi raundning o‘zidayoq nokaut evaziga g‘alaba qozongan.

Hamzat Chapanov esa 15 ta professional jangda ishtirok etib, ularning 12 tasida g‘alabaga erishgan va 3 marta raqiblariga imkoniyatni boy berib qo‘ygan. U so‘nggi jangini 2022 yilning dekabr oyida Rossiyaning MMA Series ligasida o‘tkazib, zafar quchgan.