Putinning Xitoyga qachon borishi ochiqlandi

Rossiya Prezidenti Vladimir Putin 19-20 may kunlari Xitoyga rasmiy tashrif buyuradi. Bu haqda Kreml xabar berdi.

Fevral oyida u Xitoy rahbarining mamlakatga tashrif buyurish taklifini qabul qilgan. Putinning Xitoyga so‘nggi tashrifi 2025 yil avgust oyining oxiri –sentyabr oyining boshida bo‘lib o‘tdi.

Tashrif yaxshi qo‘shnichilik, do‘stlik va hamkorlik shartnomasi imzolanganining 25 yilligiga bag‘ishlangan.

Putin va Si Szinpin ikki davlat o‘rtasidagi ikki tomonlama munosabatlarni, "har tomonlama sheriklik va strategik hamkorlikni yanada chuqurlashtirish yo‘llarini" muhokama qiladi va asosiy xalqaro va mintaqaviy masalalar bo‘yicha fikr almashadi.

Putin va Si Szinpin o‘rtasidagi muzokaralardan so‘ng qo‘shma bayonot va bir qator ikki tomonlama hujjatlar imzolanadi.

Tashrif davomida Xitoy Xalq Respublikasi Bosh vaziri Li Syan bilan uchrashuv ham rejalashtirilgan bo‘lib, unda tomonlar savdo-iqtisodiy hamkorlik istiqbollarini muhokama qiladi.

Eslatib o‘tamiz, 13 may kuni Tramp Xitoyga uch kunlik davlat tashrifi bilan borgan edi. Bu uning so‘nggi to‘qqiz yildagi Xitoyga ilk safari bo‘ldi. Ertasi kuni u Si Szinpin bilan muzokara o‘tkazib, davlat banketida ishtirok etgan. Keyinchalik Tramp tashrifini «ajoyib» deb atab, “fantastik savdo kelishuvlari” tuzilganini ma’lum qilgan.