Putin Qodirovni mukofotladi (video)

Rossiya Prezidenti Vladimir Putin Checheniston rahbari Ramzan Qodirovga II darajali “Vatanga xizmatlari uchun” ordenini topshirdi. Bu haqda RIA Novosti xabar berdi.

Ma’lum qilinishicha, taqdirlash marosimi Kremlda bo‘lib o‘tgan. Qodirov ushbu ordenning to‘liq sohibi deb e’tirof etilishi uchun eng yuqori, 1-darajani olishi kerak.

Mukofot Qodirovga “Rossiya davlatchiligini mustahkamlash, mamlakat mudofaa qobiliyati va Checheniston Respublikasining ijtimoiy-iqtisodiy rivojlanishiga qo‘shgan katta hissasi uchun” topshirilgan.

Ma’lumot uchun, “Vatan oldidagi xizmatlari uchun” ordeni to‘rt darajaga ega, birinchisi eng yuqori hisoblanadi. Qodirov ushbu mukofotning to‘rtinchi (2006), uchinchi (2021) va ikkinchi darajalari bilan taqdirlangan. Putin fevral oyida Qodirovni ushbu ordenning ikkinchi darajasi bilan taqdirlash to‘g‘risidagi farmonni imzolagan edi.

Qodirov Chechenistonni 2007 yildan beri boshqarib kelmoqda. Uning vakolat muddati 2026 yilda tugaydi.

Eslatib o‘tamiz, avvalroq Checheniston rahbari Ramzan Qodirov Rossiyaning Lyudvig Nobel mukofoti bilan taqdirlangandi. Mukofotni Butunrossiya badiiy gimnastika federatsiyasi prezidenti, Lyudvig Nobel mukofoti laureati Irina Viner topshirgan.