Prezidentga tibbiyot sohasiga doir 1,5 mingdan ortiq murojaat keldi – SSV

Prezidentning tibbiyot xodimlari bilan ochiq muloqoti uchun tashkil etilgan “Sall-markaz”ga 1500 dan ortiq murojaat kelib tushdi

O‘zbekiston Prezidenti Shavkat Mirziyoyevning mamlakat tibbiyot xodimlari bilan "O‘zbekiston tibbiyoti — inson qadri uchun” mavzusida ochiq muloqot o‘tkazishi rejalashtirilmoqda. Bu haqda Sog‘liqni saqlash vazirligi xabar bergan.

Shavkat Mirziyoyevning mamlakat tibbiyot xodimlari bilan "O‘zbekiston tibbiyoti — inson qadri uchun” mavzusida ochiq muloqoti doirasida CSV tomonidan maxsus “Sall-markaz” faoliyati yo‘lga qo‘yilgan. “Sall-markaz”ga shu kunga qadar tibbiyot xodimlari va aholi vakillaridan jami 1512 ta murojaat kelib tushgan.

Qayd etilishicha, tibbiyot xodimlari murojaatlarining 783 tasi (80 foizi) o‘z yechimini topgan, 190 tasi (20 foizi) ijro jarayonida.

Hududlar kesimida eng ko‘p murojaat Toshkent shahri (158 ta), Qashqadaryo (100 ta) va Farg‘ona (89 ta), Andijon (82 ta) viloyatlari hissasiga to‘g‘ri kelmoqda. 

Ko‘tarilgan masalalarni o‘z vaqtida hal etish va bildirilgan takliflarga kompleks yondashish maqsadida murojaatlar:

• birlamchi tibbiy yordam, 
• shoshilinch va tez tibbiy yordam, 
• ixtisoslashtirilgan markazlar faoliyati, 
• ilm-fan, 
• oliy tibbiy ta’lim, 
• tibbiy-ijtimoiy himoya, 
• farmatsevtika, 
• onalik va bolalikni muhofaza qilish, 
• sanitariya-epidemiologiya xizmati, 
• xususiy tibbiyot,
• malaka oshirish,
• sog‘lom turmush tarzi,
• yuridik xizmat,
• o‘rta maxsus tibbiy ta’lim,
• davlat-xususiy sherikchilik kabi qator yo‘nalishlarga ajratilgan. 

Misol uchun, shu paytgacha yo‘llangan murojaatlarning 297 tasi sog‘liqni saqlash tizimining birlamchi bo‘g‘iniga, 109 tasi tez tibbiy yordam xizmatiga, 95 tasi ixtisoslashgan markazlar faoliyatiga, 74 tasi ilm-fan yo‘nalishiga daxldor. 

Vazirlik murojaatlarning aksariyati “Sall-markaz”ga biriktirilgan mutaxassislar  tomonidan hal qilinsa, bir qismi tibbiyot xodimlari bilan bo‘ladigan ochiq muloqotda  O‘zbekiston Respublikasi Prezidentiga to‘g‘ridan-to‘g‘ri yetkazilishini eslatib o‘tgan.