Prezident yoshlarga oyiga 1,2 milliondan pul bermoqchi

Yoshlar daftariga kiritilgan yoshlarga zamonaviy kasblar, axborot texnologiyalari va xorijiy tillarni o‘rganishi uchun har biriga oyiga 1 million 200 ming so‘mdan subsidiya beriladi. Bu haqda O‘zbekiston Prezidenti Shavkat Mirziyoyev bugun, 30 iyun – Yoshlar kuni munosabati bilan “Yangi O‘zbekiston” bog‘ida o‘tkazilayotgan bayram tadbirida ma’lum qildi. 

“Yoshlar daftariga kiritilgan yoshlarga zamonaviy kasblar, axborot texnologiyalari va xorijiy tillarni o‘rganishi uchun har biriga oyiga 1 million 200 ming so‘mdan subsidiya beriladi. Shuningdek, yoshlarga ilm-fan, sport, san’at va madaniyat yo‘nalishlaridagi to‘garaklar uchun 6 oy davomida 300 ming so‘mdan pul to‘lanadi. Ularga ushbu yo‘nalishlar bo‘yicha mahalliy olimpiadalarda qatnashish xarajatlari uchun – 1 million 200 ming so‘mdan, nufuzli xalqaro olimpiadalar uchun – 12 million so‘mdan mablag‘ ajratiladi”, dedi Shavkat Mirziyoyev.

Mirziyoyevga ko‘ra, endi texnikumlarga qabul yilda 2 marta tashkil etilib, talabalar uchun davlat granti soni 2 barobarga oshiriladi. Shuningdek, texnikumlar uchun ta’lim krediti joriy qilinadi va 80 mingdan ziyod yoshlarga kredit berish uchun moliyaviy resurs ajratiladi.

“O‘tgan o‘quv yilida birgina Prezident maktablarini bitirgan 424 nafar o‘g‘il-qizlarning barchasi oliy ta’lim muassasalariga qabul qilindi. Ularning 102 nafari (24 foizi) xorijdagi yetakchi oliy ta’lim muassasalarida o‘qiyotgani tahsinga sazovordir. 2 yilda 400 nafar yoshlar “El-yurt umidi” jamg‘armasi orqali chet ellardagi eng nufuzli oliygohlarda o‘qishga yuborildi”, deydi davlat rahbari.