Prezident “Psixiatriya yordami to‘g‘risida”gi qonunni imzoladi

O‘zbekistonda ruhiy holati buzilgan shaxslarning huquqlari kengaytirildi. Bu haqda O‘zbekiston Respublikasi Prezidenti “Psixiatriya yordami to‘g‘risida”gi qonunda belgilangan.

Qonunga “ma’lumotlarni bilgan holda tibbiy aralashuvga ixtiyoriy ravishda rozilik berish”, “psixiatriya yordami”, “ruhiy holatning buzilishi” va boshqa bir qator asosiy tushunchalar kiritildi.

Shuningdek, ular o‘zida mavjud bo‘lgan ruhiy holati buzilishining xususiyati va qo‘llanilayotgan davolash usullari haqidagi axborotni o‘zi uchun tushunarli shaklda, o‘z vaqtida hamda to‘liq olish, shuningdek statsionar sharoitlarda psixiatriya yordami ko‘rsatadigan tibbiyot muassasasida faqat psixiatriya yordami ko‘rsatish uchun zarur bo‘lgan muddat mobaynida bo‘lish huquqiga ega.

Qonunga ko‘ra, psixiatriya tekshiruvidan o‘tkazish tekshirilayotgan shaxsda ruhiy holati buzilishining mavjudligini, psixiatriya yordami ko‘rsatishga bo‘lgan zaruriyatni aniqlash, shuningdek bunday yordam turi haqidagi masalani hal qilish uchun amalga oshiriladi.

Bundan tashqari, psixiatriya yordami ko‘rsatish bo‘yicha faoliyat bilan shug‘ullanish huquqiga ega shaxslar doirasi aniq belgilab qo‘yildi. 

Unga ko‘ra, maxsus oliy tibbiy ma’lumotga ega tibbiyot xodimlari (shifokor-psixiatr, tibbiy psixolog va psixoterapevt) psixiatriya yordami ko‘rsatish bo‘yicha shifokorlik faoliyati bilan shug‘ullanish huquqiga ega.

Qonun bilan dispanser kuzatuvida turgan ruhiy holati buzilgan shaxslarning yagona elektron reyestri yuritilishi belgilandi.