Prezident paxtachilik bo‘yicha yig‘ilish o‘tkazdi

Bugun, 27 iyul kuni O‘zbekiston Prezidenti Shavkat Mirziyoyev paxtachilikdagi dolzarb vazifalar muhokamasi yuzasidan yig‘ilish o‘tkazdi. Bu haqda Prezident Matbuot xizmati xabar berdi.

Yig‘ilishda Innovatsion rivojlanish vaziri, Paxtachilik kengashi raisi Ibrohim Abdurahmonov kengash tomonidan amalga oshirilayotgan ishlar to‘g‘risida hisobot bergan.

Unda aytilishicha, kengash a’zolari olim va mutaxassislar bilan birga Quyichirchiq, Sayxunobod, Navbahor, Narpay, Vobkent va Qorako‘l tumanlariga borib, haqiqiy ahvolni o‘rgangan. Jumladan, urug‘lik paxta ekilgan maydonlarda ko‘chat tig‘izligi me’yorga nisbatan 35-40 foizga oshirib yuborilgani aniqlangan. Ayrim dalalarda g‘o‘zaning tepasida hosil deyarli yo‘q, pastida esa 2-3 ta ko‘sak bor, xolos. Zararli hasharot va kasallik turlari ham ko‘paygan.

Yig‘ilishda bunday holatda g‘o‘zani parvarishlash va hosildorlikni ta’minlash bo‘yicha tavsiya va ko‘rsatmalar aytib o‘tilgan. Ularni barcha hududlarda amalga oshirish bo‘yicha “dolzarb 30 kunlik” e’lon qilingan.

Klaster va fermerlarning dalasiga borib, ilmiy yondashuv va yangiliklarni tushuntirish zarurligi ta’kidlangan.

“Iqlim o‘zgarishi kelgusida ham salbiy ta’sir ko‘rsatishini hisobga olib, ish tutishimiz kerak. Bu masalaga ilmiy yondashish shart”, degan Shavkat Mirziyoyev.

Viloyat hokimlari ushbu dolzarb kunlarda qilinadigan ishlar bo‘yicha axborot bergan.

Ma’lumot uchun, paxtachilik qishloq xo‘jaligi va aholi bandligida alohida o‘rin tutadi. Shu bois Prezident tashabbusi bilan paxta yetishtirishda klaster tizimi joriy etilgan. Ushbu tizim natijasida 350 ga yaqin yirik fabrika ishga tushirilgan. Besh yil avval mamlakatda yetishtirilgan paxta tolasining atigi 40 foizi qayta ishlangan bo‘lsa, bugungi kunda 100 foiz o‘zimizda qayta ishlanmoqda.

So‘nggi yillardagi iqlim o‘zgarishlari paxtachilik oldiga yangi vazifalar qo‘ymoqda. Xususan, bu yilgiday anomal issiq ilgari hech qachon bo‘lmagan. O‘n kundan beri O‘zbekistonda kunduzgi harorat 43 gradusdan yuqori bo‘lmoqda. Kechki payt ham kam emas.

Bu paxtachilik uchun favqulodda vaziyat. Lekin barcha imkoniyatlarni safarbar qilib, hosilni saqlab qolish zarur. Buning uchun urug‘chilik, nav tanlash, o‘g‘itlash, sug‘orish va zararkunandalarga qarshi kurashishni ilmiy yondashuvlar asosida yo‘lga qo‘yish kerak.

Shu ma’noda, davlat rahbarining “Paxta hosildorligini oshirish, paxta yetishtirishda ilm va innovatsiyalarni joriy qilishning qo‘shimcha tashkiliy chora-tadbirlari to‘g‘risida”gi qaroriga ko‘ra, Paxtachilik kengashi tuzilgan.