Prezident G‘aniyevni Bosh vazir o‘rinbosari lavozimiga tayinlash to‘g‘risidagi farmonni imzoladi

O‘zbekiston Respublikasi Prezidenti Shavkat Mirziyoyev joriy yilning 24 sentyabr kuni Bosh vazirning agrar va oziq-ovqat sohalarini rivojlantirish masalalari bo‘yicha o‘rinbosarini tayinlash to‘g‘risidagi farmonni imzoladi. Bu haqda Adliya vazirligining "Huquqiy axborot" kanalida xabar berildi.

PF-6069 sonli farmon bilan Shuhrat Madaminovich G‘aniyev O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari lavozimiga tayinlandi. 

Ma’lumot o‘rnida, Shuhrat G‘aniyev 2012 yildan Farg‘ona viloyati hokimi lavozimida faoliyat yuritib kelayotgan edi. 25 sentyabr kuni uning o‘rninini 2015 yildan Namangan viloyati hokimi lavozimida ishlagan Xayrulla Bozorov egalladi. 

Shuhrat G‘aniyev 1968 yilning 11 sentyabr kuni Farg‘ona viloyati, Marg‘ilon shahrida tavallud topgan. Millati – o‘zbek. Partiyaviyligi yo‘q. Ma’lumoti – oliy. 

1992 yilda  Toshkent davlat agrar universiteti, 2005 yilda Toshkent kimyo-texnologiya institutini tamomlagan. 2015 yildan buyon O‘zbekiston Respublikasi Oliy Majlisi Senati a’zosi.
 
Ish faoliyatini 1989 yilda Farg‘ona viloyati matlubot birlashmasi Marg‘ilon bazasi etakchi mutaxassisi lavozimida boshlagan. 

1996-2000 yillarda – Marg‘ilon tumanlararo “Agrokimyota’minot” aksiyadorlik jamiyati boshqaruvi raisining o‘rinbosari, boshqaruvi raisi;

2000-2001 yillarda – Farg‘ona viloyati “Agrokimyota’minot” aksiyadorlik birlashmasi boshqaruvi raisi;

2001-2002 yillarda – Farg‘ona viloyati “Qishloqxo‘jalikkimyo” aksiyadorlik birlashmasi boshqaruvi raisi;

2002-2004 yillarda – “O‘zqishloqxo‘jalikkimyo” davlat-aksiyadorlik kompaniyasi boshqaruvi raisining o‘rinbosari;

2004-2007 yillarda – “O‘zkimyosanoat” davlat-aksiyadorlik kompaniyasi boshqaruvi raisining o‘rinbosari;

2007-2008 yillarda – O‘zbekiston Respublikasi Vazirlar Mahkamasi Qishloq va suv xo‘jaligi,  qishloq xo‘jaligi mahsulotlarini qayta ishlash hamda  iste’mol tovarlari masalalari axborot-tahlil departamentining mudiri;

2008-2011 yillarda – Farg‘ona viloyati hokimining qishloq va suv xo‘jaligi masalalari bo‘yicha birinchi o‘rinbosari;

2011-2012 yillarda – Farg‘ona viloyati hokimi vazifasini bajaruvchisi bo‘lib ishlagan. 

Ma’lumot o‘rnida, Shuhrat G‘aniyev afg‘on urushi ishtirokchisi sanaladi. 2019 yilda Sobiq ittifoq qo‘shinlarining Afg‘onistondan chiqarilganiga 30 yil to‘lishi munosabati bilan Afg‘oniston urushi faxriysi sifatida Shuhrat G‘aniyev qimmatbaho toshli orden bilan taqdirlangandi. 

Prezident farmoni imzolanganidan bir kun o‘tib 25 sentyabr kuni Oliy Majlis Qonunchilik palatasining navbatdagi majlisi bo‘lib o‘tdi. Unda deputatlar Bosh vazirning agrar va oziq-ovqat sohalarini rivojlantirish masalalari bo‘yicha o‘rinbosari lavozimiga Shuhrat G‘aniyev nomzodini ko‘rib chiqdilar.

Xalq vakillari tomonidan Shuhrat G‘aniyev nomzodi ma’qullandi.