Polshaga Janubiy Koreyadan raketa tizimi yetib keldi

Janubiy Koreyada ishlab chiqarilgan birinchi K239 Chunmoo raketa tizimi Polshaga yetkazildi. Bu haqda X ijtimoiy tarmog‘ida (sobiq Twitter) Polsha Milliy mudofaa vaziri Mariush Blashak ma’lum qildi.

"Koreyaning birinchi K239 Chinmoo raketa tizimi Polshaga yetkazildi. U Polshaning Jelcz yuk mashinasiga o‘rnatildi. Bu yil bizga yana bir [shunday] raketa tizimi yetkazib beriladi", deb yozgan Blashak.

O‘tgan yili Varshava va Seul 980 ta K2 tanki, 648 ta K9 gaubitsasi, 48 ta FA-50 yengil qiruvchi samolyoti va 288 ta K239 Chunmoo ko‘p uchiruvchi raketa tizimini yetkazib berishga kelishib olgan. Bitimning umumiy qiymati 12,4 milliard dollarni tashkil etadi. Birinchi tank va gaubitsalar Polshaga o‘tgan yilning dekabr oyida, samolyotlar esa shu yilning yozida yetib kelgan.

Eslatib o‘tamiz, oldinroq Polsha Prezidenti Anjey Duda Koreya Respublikasiga safarini bekor qilgandi. Bunga Belarus harbiy vertolyotlarining Polsha havo hududiga bostirib kirishi munosabati bilan kuchayib borayotgan keskinlik, shuningdek Koreya yarim oroliga tushishi kutilgan “Kanun” to‘foni sabab bo‘lgandi.