Pentagonning Rossiyaga tish-tirnog‘i bilan qarshi sobiq rahbari vafot etdi

Pentagonning sobiq rahbari Eshton Karter bugun, 25 oktyabr kuni AQSHda 68 yoshida vafot etdi. Bu haqda “Reuters” agentligi xabar berdi. 

Karter Amerika Qo‘shma Shtatlaridagi Yel universitetini tamomlagan, u yerda fizika va o‘rta asrlar tarixi bo‘yicha bakalavr darajasini olgan. 

1993-1996 yillarda Prezident Bill Klinton ma’muriyatida Karter Mudofaa vazirining o‘rinbosari bo‘lib ishlagan va yadroviy xavfsizlik va yadro qurolini tarqatmaslik uchun mas’ul bo‘lgan. Bu davrda u Ukraina, Belarus va Qozog‘istondan yadroviy qurollarni olib chiqish dasturlarini amalga oshirishda ishtirok etgan va sobiq SSSR hududida yadroviy, kimyoviy va biologik qurollarni utilizatsiya qilish bo‘yicha Nann-Lugar dasturining koordinatorlaridan biri bo‘lgan. U Shimoliy Koreyadagi inqiroz davrida (1993-94) harbiy ssenariyni ishlab chiqishda ishtirok etgan va sobiq Yugoslaviya hududidagi mojaro paytida (1995) Bosniyadagi Rossiya harbiylarining mavjudligi bo‘yicha muzokaralarda ishtirok etgan. U yadroviy sinovlarni har tomonlama taqiqlash va strategik hujum qurollarini qisqartirish va cheklash bo‘yicha kelishuvlarni tayyorlashda ekspertlar va muzokarachilar qatorida edi.

2014 yil dekabrida AQSH Prezidenti Barak Obama Eshton Karter AQSH Mudofaa vaziri lavozimiga tayinlanganini e’lon qilgan edi. Senatning Qurolli kuchlar qo‘mitasidagi tinglovda Karter Rossiyaga nisbatan keskin pozitsiyani egalladi. Xususan, u G‘arb davlatlari Rossiyaga sobiq ittifoq respublikalari, jumladan, Ukrainani o‘zlarining alohida manfaatlari zonasi sifatida ko‘rish huquqini bermasligi kerak, dedi.  U Moldova, Gruziya va Ukraina kabi amerikalik hamkorlarni NATO bilan xavfsizlik va harbiy hamkorlikni kuchaytirishga chaqirish niyatini bildirdi. Karter Kiyevga Amerika qurollarini yetkazib berish g‘oyasini qo‘llab-quvvatladi va Amerikaning Yevropada, shu jumladan Boltiqbo‘yi mamlakatlarida harbiy ishtirokini kengaytirishni yoqladi. 

U 2015 yil 17 fevraldan 2017 yil 20 yanvargacha Mudofaa vaziri lavozimida ishlagan.