Pentagon xodimi maxfiy ma’lumotlarni xorijga sotmoqchi bo‘ldi

Pentagon razvedka boshqarmasining IT mutaxassisi milliy mudofaa ma’lumotlarini xorijiy hukumat vakiliga o‘tkazishga uringanlikda gumonlanib hibsga olindi. Bu haqda AQSH Adliya vazirligi xabar berdi.

Vazirlik ma’lumotlariga ko‘ra, virjiniyalik 28 yoshli Neytan Vilas Latch 2019 yildan beri AQSH Mudofaa vazirligida fuqarolik xodimi sifatida ishlagan. U yaqinda Ichki tahdidlar bo‘limida bo‘lgan va maxfiy hujjatlarga kirish huquqiga ega bo‘lgan.

FQB 2025 yil mart oyida Latch maxfiy ma’lumotlarni “do‘stona” mamlakatlardan birining rasmiylari bilan bo‘lishishga tayyorligini sezib qolgan. Biroq bu qaysi davlat ekani aniqlanmagan.

FQB agenti ushbu davlat vakili niqobi ostida Pentagon xodimi bilan yozishmalarga kirishgan. Maktublarning birida Latch "[AQSH Prezidenti] ma’muriyatining qadriyatlariga qo‘shilmasligini" va shuning uchun chet el fuqaroligi yoki "boshqa tovon" evaziga "maxfiy ma’lumotlarni almashishga" tayyor ekanligini aytdi.

May oyi boshida Pentagon xodimi “xorijiy hukumat vakili” bilan kelishib, bog‘da maxfiy hujjatlarni o‘z ichiga olgan flesh-diskni qoldirgan. Tez orada ular Latch qo‘shimcha ma’lumotlarni topshirishga kelishib olgan. 29 may kuni u uchrashuv joyida hibsga olingan. Latch bugun, 30 may kuni sudga chiqishi rejalashtirilgan.