Ozarbayjon armiyasining Armaniston bilan chegarasi va Qorabog‘dagi pozitsiyalari o‘qqa tutildi – Baku

Armaniston Qurolli kuchlari Ozarbayjon armiyasining chegaradagi Kalbajar viloyatidagi pozitsiyalarini o‘qqa tutdi. Bu haqda Ozarbayjon Mudofaa vazirligi matbuot xizmati xabar berdi.

“11 avgust kuni soat 21:10 dan 21:30 gacha Armaniston Qurolli Kuchlari bo‘linmalari Ozarbayjon armiyasining Kalbajar viloyatining Byazirxon va Zyaylik aholi punktlari yo‘nalishidagi pozitsiyalarini o‘qqa tutdi”, deyiladi xabarda.

Bundan tashqari, vazirlik ma’lumotlariga ko‘ra, bugun, 12 avgust kuni ertalab respublika Qurolli kuchlarining Agdam viloyatidagi pozitsiyalari o‘qqa tutilgan. 

“12 avgust kuni soat 07:43da Rossiya tinchlikparvar kuchlari vaqtincha joylashgan Ozarbayjon hududidagi noqonuniy arman qurolli tuzilmalari Agdam yo‘nalishidagi armiyamiz pozitsiyalarini kichik masofadan o‘qqa tutdi”, deyiladi rasmiy Baku bayonotida.

Shuningdek, Mudofaa vazirligi Ozarbayjon bo‘linmalari tegishli javob choralarini ko‘rganini qo‘shimcha qilgan.

Eslatib o‘tamiz, kecha, 11 avgust kuni Armaniston BMTga Qorabog‘dagi vaziyatni muhokama qilish uchun Xavfsizlik kengashining favqulodda yig‘ilishini o‘tkazish iltimosi bilan murojaat qilgandi.