Oyda futbol uchrashuvi o‘tkazilishi mumkin

Olimlar 2035 yilda Oyda ilk bor futbol o‘yinini o‘tkazish loyihasini ishlab chiqdi. Bu haqda “The EIT” xabar berdi.

Manbaga ko‘ra, Buyuk Britaniyaning Muhandislik va texnologiya instituti olimlari Oyda ilk bor futbol o‘yinini o‘tkazish loyihasini ishlab chiqdi. Mazkur o‘yin 2035 yilda tashkil etilishi mumkin. Unda odatdagidan bir yarim baravar katta bo‘lgan qora-oq to‘pdan foydalanish taklif etilmoqda. Shlemlar esa o‘yinchilar va murabbiylar o‘rtasida muloqot qilish, hakamlar qarorlari va kostyumning holatini ko‘rsatuvchi moslamalar bilan jihozlanadi.

Oy futbolida har ikki jamoada 5 nafardan sportchi ishtirok etadi va ularga jihozlarni ishdan chiqarmaslik uchun bosh bilan o‘ynash taqiqlanadi. Futbolchilardan to‘pga egalik qilish emas, balki to‘xtatib qolish talab qilinadi. Shuningdek, Oy sirtida yassi maydon hosil qilish uchun lazer texnologiyasi qo‘llaniladi. O‘yin maydonining uzunligi 32 metr, eni esa 25 metrni tashkil qiladi. Darvozalar ham odatdagidan farqli ravishda eniga deyarli 11 metr va balandligi 3 metrga o‘zgartiriladi.

Ma’lum qilinishicha, Muhandislik va texnologiya instituti 4 yoshdan 13 yoshgacha bo‘lgan britaniyalik bolalar o‘rtasida birinchi o‘zga sayyoralik “Moon Utd” jamoasi uchun liboslarni loyihalash tanlovini e’lon qilgan.