Ota-onaning aka-uka va opa-singillarining farzandlari bilan oila qurish taqiqlanishi kutilmoqda

O‘zbekiston Respublikasi Oila kodeksiga kiritilishi kutilayotgan o‘zgartirishga ko‘ra, endi nafaqat yaqin qarindoshlari, balki ota-onaning aka-uka va opa-singillarining farzandlari bilan ham turmush qurish mumkin emas. Yuqoridagilarni nazarda tutuvchi “O‘zbekiston Respublikasi Oila kodeksining 16-moddasiga qo‘shimcha kiritish to‘g‘risida”gi O‘zbekiston Respublikasi Qonuni loyihasi Normativ-huquqiy hujjatlar loyihalari muhokamasi portaliga joylashtirildi. 

Qonun bilan O‘zbekiston Respublikasining 1998 yil 30 aprelda qabul qilingan 607-1-sonli Qonuni bilan tasdiqlangan O‘zbekiston Respublikasining Oila kodeksi (O‘zbekiston Respublikasi Oliy Majlisining Axborotnomasi, 1998 y., 5-6-songa ilova; 2003 y., 1-son, 8-modda; 2004 y., 1-2-son, 18-modda; O‘zbekiston Respublikasi qonun hujjatlari to‘plami, 2007 y., 14-son, 133-modda; 2008 y., 16-son, 117-modda; 2009 y., 37-son, 401-modda; 2010 y., 35-36-son, 300-modda, 37-son, 313-modda; 2011 y., 40-son, 410-modda; 51-son, 542-modda; 2013 y., 18-son, 233-modda; 2014 y., 4-son, 45-modda; 2016 y., 39-son, 457-modda; 2017 y., 37-son, 978-modda; Qonun hujjatlari ma’lumotlari milliy bazasi, 05.01.2018 y., 03/18/456/0512-son, 10.01.2018 y., 03/18/459/0536-son, 19.04.2018 y., 03/18/476/1087-son) 16-moddasining  uchinchi xatboshisi quyidagi tahrirda bayon etiladi;

“nasl-nasab shajarasi bo‘yicha to‘g‘ri tutashgan qarindoshlar o‘rtasida,  tug‘ishgan va o‘gay aka-ukalar bilan opa-singillar o‘rtasida, ota-onaning aka-uka va opa-singillarining farzandlari o‘rtasida, shuningdek farzandlikka oluvchilar bilan farzandlikka olinganlar o‘rtasida;”

Amaldagi Oila kodeksida 16-moddaning uchinchi xatboshisi quyidagicha bayon etilgan: 

nasl-nasab shajarasi bo‘yicha to‘g‘ri tutashgan qarindoshlar o‘rtasida, tug‘ishgan va o‘gay aka-ukalar bilan opa-singillar o‘rtasida, shuningdek farzandlikka oluvchilar bilan farzandlikka olinganlar o‘rtasida;

O‘zbekiston Respublikasi Sog‘liqni saqlash vazirligi, Adliya vazirligi, Xotin-qizlar qo‘mitasi va “Oila” ilmiy-amaliy tadqiqot markazi ushbu Qonunning ijrochilarga yetkazilishini hamda uning mazmun-mohiyati va ahamiyati to‘g‘risida aholi o‘rtasida tushuntirish ishlari olib borilishini ta’minlashi belgilangan.