Obama, Klinton va Sanders keyingi yil Tramp Prezident bo‘lishini xohlamaydi

north_east

Tramp o‘ziga ikkinchi marta saylanish imkoniyatini kafolatladi

Sobiq AQSH prezidentligiga nomzod va AQSH davlat kotibi Hillari Klinton 2020 yilgi prezidentlik saylovlarida amaldagi mamlakat Prezidenti Donald Tramp g‘olib bo‘lishini xohlamaydi. Klinton xonim saylovlarda nomzod Jo Baydenni qo‘llab-quvvatlashini ma’lum qildi.

Klinton koronavirus inqirozining ayollarga ta’siriga bag‘ishlangan ochiq onlayn yig‘ilishda saylovda kimni qo‘llab-quvvatlashini rasman e’lon qildi. Uning so‘zlariga ko‘ra, u nafaqat Baydenni Prezident sifatida qo‘llab-quvvatlaydi, balki unga ushbu prezidentlik saylovida muhim masalalarda kurashishda yordam beradi.

U ushbu nomzodlikni qo‘llab-quvvatlagan bir qator demokratik siyosatchilardan biri bo‘ldi. Ilgari AQSH prezidentligiga nomzod bo‘lgan senator Elizabet Uorren joriy yilning 15 aprel kuni Baydenni qo‘llab-quvvatlashini ma’lum qilgan.

Shuningdek, 14 aprel kuni senator Berni Sanders, bir necha oy avvalgi o‘zining sobiq raqibi Baydenni qo‘llab-quvvatlayotganini e’lon qildi. Bundan tashqari AQSHning sobiq Prezidenti Barak Obama ham Jo Baydenni qo‘llab-quvvatlagan.

Forbes ma’lumotlariga ko‘ra, Baydenning reytingi amaldagi Prezidentnikidan yuqori. Amerikaliklarning yarmidan ko‘pi unga ovoz berishga tayyor. Uning saylovoldi kampaniyasi jinsiy zo‘ravonlik haqidagi ayblovlar fonida o‘tmoqda. Baydenning sobiq yordamchilari uning nomaqbul xatti-harakatlar qilgani ustidan da’vo qilmoqda.