O’Melli Devis bilan boks qoidalariga ko‘ra jang qilmoqchi

Amerikalik UFC jangchisi Shon O’Melli boks bo‘yicha uch vazn toifasida mutlaq jahon chempioni Jervonta Devis bilan boks qoidalari bo‘yicha jangi o‘tkazishni istayotganligini ma’lum qildi. 

“Jervonta Devisni savalashga qarshi emasman. Bilaman, hamma hozir meni Konorga o‘xshatadi. Lekin men sizlarni ishontirib aytaman, bu jang bo‘ladi. Uning bo‘yi juda kichkina. O‘ylaymanki, UFC bu jangga qarshi bo‘lmaydi. Balki men yana bir nechta jangda g‘alaba qozonishim, yana bir kamar yutishim kerakdir. Jervonta ham ancha mashhur, lekin bu to‘qnashuv albatta bo‘ladi”, deydi Shon O’Melli.

28 yoshli amerikalik Shon O’Melli Bostondagi UFC-292 turnirining asosiy jangida hamyurti Aljameyn Sterlingni mag‘lub etgan edi. Jang ikkinchi raundda, O’Mellining to‘xtovsiz zarbalariga Sterling toqat qila olmagach, hakam tomonidan to‘xtatildi. Bu O’Mellining faoliyatidagi 17-g‘alabasi bo‘ldi.