Nursulton Ro‘ziboyev Toshkentda jang o‘tkazishi mumkin

O‘zbekistonlik UFC jangchisi Nursulton Ro‘ziboyev Toshkentda jang o‘tkazishi mumkin. Bu haqda sportchining o‘zi QALAMPIR.UZ'ga ma’lum qildi.

Unga ko‘ra, Ro‘ziboyev joriy yilning 30 iyul kuni Toshkent shahrida tashkil etiladigan professional boks oqshomida ringga chiqish taklifini olgan. O‘sha kuni unga gruziyalik bokschi Mixail Kutsishvili raqiblik qilishi kutilmoqda.

Mazkur musobaqa “Anhor Lokomotiv” istirohat bog‘ida bo‘lib o‘tadi.

Ma’lumot uchun, Nursulton Ro‘ziboyev MMA'dagi faoliyatini muvaffaqiyatli davom ettirish bilan bir qatorda professional boksda ham 2 ta jang o‘tkazgan va har ikkalasida g‘alaba qozongan. Mixail Kutsishvili esa boksda Nursultonga qaraganda ancha tajribali bo‘lib, jami 89 ta jangda ishtirok etgan. U 32 marta zafar quchgan bo‘lsa, 51 marta raqiblariga imkoniyatni boy berib qo‘ygan. Shu bilan birga, 6 ta durang natija qayd etgan.