Nuriddin Ismoilov Qonunchilik palatasi Spikeri etib saylandi

Bugun, 18 noyabr kuni Toshkent shahrida yangi chaqiriq O‘zbekiston Respublikasi Oliy Majlisi Qonunchilik palatasining birinchi tashkiliy majlisi bo‘lib o‘tmoqda.

Majlisda “O‘zbekiston Respublikasi Oliy Majlisi Qonunchilik palatasining Reglamenti to‘g‘risida”gi Qonunga muvofiq, quyi palata a’zolari Qonunchilik palatasi Spikeri lavozimiga nomzod ko‘rsatish uchun deputatlar orasidan Siyosiy partiyalar vakillari kengashini tuzdi.

Qisqa tanaffusdan so‘ng, Siyosiy partiyalar vakillari kengashining taklifiga binoan, deputatlar yashirin ovoz berish yo‘li bilan O‘zXDP dan saylangan Nuriddin Ismoilovni O‘zbekiston Respublikasi Oliy Majlisi Qonunchilik palatasining Spikeri etib sayladi. 

Ma’lumot o‘rnida, Nuriddin Ismoilov 1959 yil 20 yanvar kuni Namangan viloyati Uchqo‘rg‘on tumanida tavallud topgan. Millati – o‘zbek. Ma’lumoti – oliy. 1980 yilda Toshkent davlat universitetini tamomlagan. Yuridik fanlari nomzodi. 1999 yil “Shuhrat” medali, 2002 yil “Do‘stlik” ordeni bilan mukofotlangan.