Nurdinjon Ismoilov Erdo‘g‘an qabulida bo‘ldi

O‘zbekiston Oliy Majlis Qonunchilik palatasi Spikeri Nurdinjon Ismoilov Turkiyaga borib, Prezident Rajab Toyib Erdo‘g‘anning qabulida bo‘ldi. Bu haqda Oliy Majlis Qonunchilik palatasi Matbuot xizmati xabar bermoqda. 

Bugun, 9 oktyabr kuni Turkiyaning hukmron“Adolat va taraqqiyot” partiyasining navbatdagi IV katta kongressi bo‘lib o‘tdi. Unda ishtirok etgan Rajab Toyib Erdo‘g‘an Oliy Majlis Qonunchilik palatasi Spikeri Nurdinjon Ismoilovni qabul qilgan. 

Ma’lum qilinishicha, uchrashuvda keyingi yillarda O‘zbekiston-Turkiya munosabatlari ikki va ko‘p tomonlama hamkorlik shaklida rivojlanib, mintaqalar o‘rtasidagi aloqalar sezilarli darajada jonlanib, muntazamlik kasb etib borayotgani qayd etilgan.

Bundan tashqari, Nurdinjon Ismoilov shu kuni Buyuk Millat Majlisi (parlament) raisi No‘mon Kurtulmush bilan ham uchrashdi.

Uchrashuvda “O‘zbekiston-Turkiya” parlamentlararo do‘stlik guruhi faoliyati va uning doirasida amalga oshirilayotgan qator ijobiy ishlar qayd etilib, parlamentlararo aloqalarni yangi bosqichga olib chiqish, hamkorlikni mustahkamlash masalalari ham ko‘rib chiqilgan.