“Non shahri” Toshkentda kuniga qancha non uvol bo‘ladi?

Toshkent shahrida bir kunda 3 tonna non axlatga tashlanadi. Bu haqda shahar “Maxsustrans” ishlab chiqarish boshqarmasi bosh inspektori Ismoil Sagdullayevga tayanib, O‘zA xabar berdi.

Ma’lum qilinishicha, ayni paytda poytaxtda eng ko‘p chiqindiga tashlanadigan mahsulot bu – non va oziq-ovqat mahsulotlari hisoblanadi. Shuningdek, bu mahsulotlarni yildan yilga chiqindiga tashlash holatlari ortib bormoqda. 

Xususan, Toshkent shahrida bir kunda 2 ming 300 tonna chiqindi yig‘ib olinsa, shundan 3 tonnaga yaqini nondan iborat.

Eslatib o‘tamiz, 2022 yilgi hisob-kitoblarda Toshkent shahrida har kuni 2 tonnaga, yiliga 730 tonnaga yaqin non mahsuloti chiqindiga tashlanishi ma’lum qilingan edi. BMT 2019 yilda taqdim etgan raqamlarga ko‘ra, dunyo bo‘yicha ishlab chiqarilgan jami oziq-ovqat mahsulotlarining 1,64 milliard tonnasi (jami oziq-ovqat mahsulotlarining 31 foizi) chiqindiga aylangan. Ahamiyatlisi, yo‘qotilayotgan oziq-ovqat mahsulotlarining faqatgina 25 foizi butun dunyodagi ochlik muammosini to‘liq hal qilishi mumkin.