Niger Ukraina bilan diplomatik munosabatlarni uzdi

G‘arbiy Afrikadagi Niger davlati Ukrainani terrorchi guruhlarni qo‘llab-quvvatlashda ayblab, Kiyev bilan diplomatik aloqalarni uzganini e’lon qildi.  Bu haqda UNN xabar berdi.

Polkovnik Amadu Abdramanning ma’lum qilishicha, Niger harbiy xuntasi ham Ukrainaning “tajovuzkorligini” muhokama qilish uchun BMT Xavfsizlik Kengashiga murojaat qilishni rejalashtirmoqda.

Ma’lumot uchun, 5 avgust kuni Mali hukmron xuntasi Ukrainaning tuareg isyonchilari hujumiga aloqadorligi gumon qilinib, Kiyev bilan diplomatik munosabatlarni uzgan edi. Iyul oyining oxirida ular Mali hukumati qo‘shinlari va ular tomonida jang qilayotgan “Vagner” yollanma askarlarini mag‘lub etgan.

Avgust oyi boshida Senegal Tashqi ishlar vazirligi Malidagi isyonchilarni qo‘llab-quvvatlagani uchun Ukraina elchisini chaqirtirgan. Senegal elchining bayonotlarini terrorizmni oqlash deb hisoblashini aytgan.

Zumrad Zaripova