Niderlandiyada Putinning sobiq kuyoviga tegishli mulk hibsga olindi

Niderlandiya prokuraturasi Vladimir Putinning to‘ng‘ich qizi hisoblangan Mariya Voronsovaning sobiq eri Yorrit Faassenga tegishli Amsterdam chekkasidagi yer uchastkasini hibsga oldi. Mulk hibsga olingani haqida kecha, 25 may kuni Niderlandiya nashri “Follow the money” va Britaniya gazetasi “The Guardian” xabar berdi. 

Tergov ma’lumotlariga ko‘ra, Putinning sobiq kuyovi Duyvendrext tumanidagi 1432 kvadrat metr maydonga egalik qiladi. Uzoq vaqt davomida Putinning do‘stlari Arkadiy va Boris Rotenberg tuzilmalari yerga egalik qilishgan, ammo keyin Faassen uni 450 ming yevroga sotib olgan. 2021 yilda u yerda turar-joy binosi va oltita ofis maydoni qurishga qaror qilingan. 

“Joriy yilning 12 may kuni Niderlandiya prokuraturasi yerni moliyaviy, iqtisodiy va ekologik huquqbuzarliklar tufayli tortib oldi”, deb yozdi “The Guardian”.  

Advokat Xelen over de Lindenning tan olishicha, Faassen jinoiy ishda ayblanuvchiga aylanishi mumkin, ammo uning so‘zlariga ko‘ra, hozircha mavjud hujjatlardan buni aniq aniqlash mumkin emas. 

Faassenning tanishi “Proyekt” nashriga aytishicha, Putinning sobiq kuyovi yaqinda Amsterdamga uchib ketgan, biroq Niderlandiya huquq-tartibot idoralari unga qiziqish bildirgani uchun Rossiyaga qaytishga majbur bo‘lgan. Niderlandiya razvedkasidagi manbaning aytishicha, Faassen Amsterdamga kelganida sanksiyalardan bo‘yin tovlash ehtimoli bo‘yicha so‘roq qilingan. 

Yorrit Faassen va Mariya Voronsova 2008 yilda turmush qurgan. Rossiya matbuotiga ko‘ra, ularning Roman ismli o‘g‘li bor, u 2022 yilda Vladimir Putinning nevaralaridan yagonasi bo‘lib, omma oldiga chiqqan. Biroq, Faassen bilan nikoh, xuddi Voronsovaning Yevgeniy Nagorniy bilan hozirgi ittifoqi kabi, rasmiylashtirilmagan. Bu Voronsovaning ikkala hamkoriga Rossiyaning Ukrainadagi urushi sababli Putinning atrofidagilarga nisbatan kiritilgan sanksiyalardan qochish imkonini berdi. Rossiya Federatsiyasi prezidentining ikkala qizi – Yekaterina Tixonova va Mariya Voronsova ham AQSH va Yevropa Ittifoqi sanksiyalari ostida.