Niderlandiyada karantinga qarshi yirik namoyish bo‘lib o‘tdi

Niderlandiyaning Gaaga shahri markazida koronavirus tufayli qo‘yilgan cheklovlarga qarshi norozilik namoyishi bo‘lib o‘tdi. Buning oqibatida 400 ga yaqin kishi hibsga olingan, deya xabar beradi shahar politsiyasi.

Gollandiya ommaviy axborot vositalarining xabarlariga ko‘ra, 21 iyun kuni Gaaga markazida bir necha ming kishi hukumatning koronavirus tarqalishiga qarshi kurash choralariga qarshi norozilik namoyishi uchun chiqqan. Dastlab shahar hokimiyati namoyishni taqiqladi, ammo keyinchalik kichik norozilik namoyishiga ruxsat berdi. Peshindan keyin namoyishchilar Malivelt parkida to‘planishdi. Ularning ba’zilari izolyatsiya rejimi va cheklovlarni bekor qilishni talab qildi.

Namoyish tinch o‘tayotgan edi, ammo 13:30 ga yaqin (Moskva vaqti bilan 16:30) voqea joyiga futbol ishqibozlari kela boshladi. Ko‘p o‘tmay, politsiyachilar namoyishchilarni orqaga qaytarish uchun shahar markazidagi savdo maydonchasini yopdi. Politsiya maxsus kuchlari yetib kelib, parlament majmuasini o‘rab oldi. Politsiya va radikal namoyishchilar o‘rtasida to‘qnashuvlar boshlandi. Radikallar politsiyachilarga turli buyumlarni ota boshladi, huquq-tartibot idoralari xodimlari o‘zlarini qalqon bilan himoya qildi va bunga javoban suv to‘pidan foydalanishdi. To‘qnashuvlar paytida tinch namoyishchilar ommaviy ravishda tarqala boshladi. Biroq ba’zilari qoldi.

"Hozirda Gaagadagi Malivelt maydoni bo‘sh. Bugungi kunda 400 ga yaqin kishi hibsga olingan. Ularning aksariyati allaqachon qo‘yib yuborilgan", dedi Gaaga politsiyasi vakili.

So‘nggi ma’lumotlarga ko‘ra, Niderlandiyada koronavirus infeksiyasining 49 593 holati aniqlangan, 6090 bemor vafot etgan.