Netanyaxu falastinlik mahbuslarni ozod qilish nega kechikayotganini aytdi

Falastinning HAMAS harakati kecha, 22 fevral kuni olti nafar isroillik garovga olinganni ozod qilganidan so‘ng, Isroil Bosh vaziri Binyamin Netanyaxu G‘azodagi o‘t ochishni to‘xtatish bo‘yicha falastinlik mahbuslarni ozod qilish “keyingi garovga olinganlarning ozod etilishi kafolatlanmaguncha va kamsituvchi marosimlar to‘xtamagunicha” kechiktirilishini aytdi. Bu haqda “The Times of Israel” xabar berdi.

north_east

HAMAS yanglishilgan jasadni Isroilga topshirdi

Netanyaxuning idorasi bugun, 23 fevral kuni erta tongda bayonot berib, G‘azo bo‘yicha o‘t ochishni to‘xtatish kelishuvi doirasida 600 dan ortiq falastinlik mahbuslarni ozod qilish kechiktirilishini aytdi.

Bosh vazir HAMASni “takroriy qoidabuzarlikda”, jumladan “garovga olinganlarni tashviqot maqsadlarida behayo foydalanishda” aybladi. Harakat hozircha Netanyaxuning so‘zlariga izoh bermadi.

Ta’kidlanishicha, uning bayonoti HAMAS vakillarining so‘nggi paytlarda garovga olinganlarni topshirish paytidagi xatti-harakatiga ishora bo‘lgan.

Ma’lumot uchun, o‘t ochishni to‘xtatish kelishuvi uch bosqichni o‘z ichiga oladi. Dastlabki 42 kunlik bosqichda jami 1900 ga yaqin falastinlik va 33 nafar isroillik asirning ozod etilishi kutilmoqda.

Eslatib o‘tamiz, kecha, 22 fevral kuni HAMAS G‘azo sektorida o‘t ochishni to‘xtatish va mahbuslarni almashish kelishuvi doirasida ikki nafarini Xalqaro Qizil Xoch qo‘mitasiga topshirgandi. Ikki isroillik mahbus Tal Shoham va Avera Mengistu G‘azo sektoridagi Rafah shahridan Qizil Xoch xodimlariga topshirilgan. Oradan ozgina vaqt o‘tib o‘sha kuni harakat a’zolari G‘azo sektori markaziy qismidagi Nuseyrat qochqinlar lageridan garovga olingan yana uch kishi – 27 yoshli Eliya Koen, 23 yoshli Omer Venkert, 22 yoshli Omer Shem-Tovni ozod qildi.