Navoiyda “O‘zbekiston” smartfonlarini ishlab chiqarish boshlandi

Jamiyat 9044
image

Navoiy shahridagi erkin iqtisodiy-industrial zonasida joylashgan “Telekom Devices PRO” MCHJ tomonidan milliy ruhda dasturlashtirilgan “O‘zbekiston” smartfonlari ishlab chiqarilmoqda.

64 gigabayt xotira quvvatiga ega ushbu smartfonlar Aloqa vazirligi topshirig‘iga asosan MCHJning loyihani mahalliylashtirish va tashqi iqtisodiy faoliyat bo‘yicha mutaxassisi Zarnigor Jumanova loyihasi asosida yaratilgan bo‘lib, milliylik nuqtai nazaridan ichki bozorga mo‘ljallab tayyorlandi. Bu haqda O‘zA xabar berdi.

“O‘zbekiston” milliy smartfonlari o‘ziga xos milliy dizayn va zamonaviy ko‘rinishga ega bo‘lib, uning dasturiy ta’minoti o‘zbekona tusga egaligi bilan ahamiyatlidir. Mobil aloqa vositasiga O‘zbekiston Respublikasi Prezidenti asarlari, klassik va zamonaviy o‘zbek adabiyotining nodir namunalari jamlanmasi, radioinssenerovkalar, 100 dan ortiq o‘zbek kuy va qo‘shiqlari , shuningdek, yurtimizning eng diqqatga sazovor go‘shalari tasviri tushirilgan foto-albomlar yuklangan”, deyiladi xabarda.

Bundan tashqari, “Hukumat” dasturi ham kiritilgan bo‘lib, dasturga barcha vazirliklar, to‘rt hokimiyat tizimi ishonch telefonlari joylashtirilgan. Telefon raqamlar o‘zgarishi bilan bog‘liq hollarda dastur avtomatik tarzda yangi raqamlarni kiritish xususiyatiga ham ega.

“Ayniqsa, telefon panelining markaziy qismiga O‘zbekiston Respublikasi gerbi tushirilishi o‘ziga xos yangilik bo‘ldi. Shu bilan birga mahsulot milliy brend ekanligini hisobga olib, telefonlarni maxsus sovg‘abop qutilarga joyladik. Boshlanishiga 3000 dona «O‘zbekiston» smartfonlari ishlab chiqargan bo‘lsak, ayni paytda mahsulotimizning 50 foizdan ko‘prog‘i sotildi. Bundan tashqari, bolalar telefon qo‘l soatlari, CDMA 450 standartidagi statsionar telefonlarni ishlab chiqarishni yo‘lga qo‘ya boshlaganmiz. O‘z o‘rnida chiqarayotgan mahsulotlarimizdagi xatolar ustida ham ishlab, texnologiyasini mukammalashtirish borasida izlanishlarni davom ettiryapmiz”, deydi “Telekom Devices PRO” MCHJ rahbari N.Rahimov.

Elektron kooperatsiya portali ma’lumotiga ko‘ra, ushbu smartfon ishlab chiqaruvchi tomonidan 3 million 499 ming so‘m qiymatda taklif etilmoqda.

Sunnatilla Abdullayev
Maqolaga baho bering
Baholaganlar: 364
Reyting: 3
Teglar
t
×