Navoiyda mudhish YTH. 1 yashar chaqaloq qurbon bo‘ldi

Navoiy viloyatida sodir bo‘lgan YTH ikki kishining umriga zomin bo‘ldi. Ulardan biri 1 yashar go‘dak. Bu haqda O‘zbekiston Respublaksi Ichki ishlar vazirligi huzuridagi Tergov departamenti xabar bermoqda. 

YTH kecha, 9 fevral kuni soat 01:50 da sodir bo‘lgan. 24 yoshli R. N.  Lacetti rusumli avtomashinasini Konimex tumani hududidan o‘tuvchi A-379 “Zarafshon-Navoiy” avtomobil’ yo‘li bo‘ylab boshqarib borib,  mazkur yo‘lning 154 kilometrida belgilangan tezlikni oshirgan holda harakatlanib kelayotgan vaqtida, boshqaruvni yo‘qotadi. Shu vaqt u qarama-qarshi harakat yo‘nalishiga chiqib ketgan va 23 yoshli N.J. ning boshqaruvida bo‘lgan Nexia rusumli avtomashinasi bilan to‘qnashib, yo‘l-transport hodisasi sodir qilgan. 

Natijada Nexia rusumli avtomashina xaydovchisi N.J. voqea joyida va avtomashina yo‘lovchisi 1 yoshli chaqaloq A.Ch. Zarafshon shahar tibbiyot birlashmasida vafot etgan. 

Mazkur holat yuzasidan Konimex tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 266-moddasi 3-qismi “a” bandi (odamlar o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.