Namoyishlar ortidan Kolumbiya universiteti rahbari ham iste’foga chiqdi

AQSHdagi Kolumbiya universiteti rahbari Minush Shafik G‘azodagi urush tufayli institutda norozilik namoyishlari boshlanganidan to‘rt oy o‘tib, o‘z lavozimidan iste’foga chiqdi. Bu haqda “The Guardian” nashri xabar berdi. 

Qayd etilishicha, Shafik xonimning iste’fosi Nyu-York shahridagi xususiy Ayvi Ligasi tadqiqot universitetlari ittifoqiga kiruvchi Kolumbiya universitetida rahbar lavozimni egallaganidan bir yil o‘tib, kuzgi semestr boshlanishiga bir necha hafta qolganida sodir bo‘ldi. Shafik xonim endi G‘azodagi urushga qarshi namoyishlar fonida iste’foga chiqqan Ayvi Ligasidagi uchinchi universitet rahbaridir.

Kecha, 15 avgust kuni Shafik xonim talabalar va o‘qituvchilarga elektron pochta orqali jamiyatdagi turli qarashlarni yengish qiyin bo‘lgan notinch davrni kuzatganini yozdi.

“Bu davr jamiyatimizdagi boshqalar kabi mening oilamga ham katta zarar yetkazdi. Yoz bo‘yi mulohaza yuritdim.  Qarorim Kolumbiyaga oldindagi qiyinchiliklarni yengib o‘tishga yordam beradi, deb o‘ylayman”, degan universitet  rahbari o‘z maktubida.

Xabarda aytilishicha, Kolumbiya universitetida Irving tibbiyot markazining bosh ijrochi direktori Katrina Armstrong muvaqqat rahbar sifatida ishlaydi.

“Men akademik tamoyillarni qo‘llab-quvvatlaydigan va hammaga adolat va rahm-shafqat bilan munosabatda bo‘ladigan yo‘ldan borishga harakat qildim. O‘zimni, hamkasblarim va talabalarni tahdid va haqorat mavzusiga aylanib qolish jamiyat uchun ham, men uchun ham, rahbar sifatida ham, shaxsiy darajada ham qayg‘uli bo‘ldi”, deb yozdi Shafik.

Shuningdek, talabalarning Isroilning HAMASga qarshi urushini qanday olib borayotganidan g‘azabi Yaqin Sharqda sodir bo‘layotgan voqealar bo‘yicha kampusdagi qizg‘in munozaralar bilan kurashayotgan universitet rahbarlari uchun bir qancha savollar tug‘dirdi. Garvard universiteti, Pensilvaniya universiteti va Massachusets texnologiya instituti rahbarlari Vakillar palatasi Ta’lim va ishchi kuchi qo‘mitasi oldida guvohlik berishdi.

Ma’lumot uchun, Shafik xonim asli misrlik mashhur iqtisodchi bo‘lib, ilgari Jahon banki, Xalqaro valyuta jamg‘armasi va Angliya bankida ishlagan. Bir muddat London Iqtisodiyot maktabi rahbari lavozimida ham faoliyat yuritgan.

Eslatib o‘tamiz, o‘tgan oyda Kolumbiya universiteti talabalari politsiyaning keskin qarshiligidan bir oy o‘tib, yana Falastinni qo‘llab-quvvatlash mitingini boshlagandi. Falastin tarafdori bo‘lgan talabalar kampusda yangi lager tashkil qilib, uni “Rafah qo‘zg‘oloni” deb atashdi.

Zebo Turobjonova