Nyu-York meri ustidan boshlangan tergov tugatilishi mumkin

AQSH Adliya vazirligi Nyu-York meri Erik Adams ustidan ochilgan korrupsiya ishi bo‘yicha tergovni tugatishni buyurdi. Bu haqda CBS xabar berdi.

Qayd etilishicha, Bosh prokuror o‘rinbosari Emil Bove Nyu-York janubiy okrugi prokurorlariga xizmat yozuvi yuborib, ular merga qo‘yilgan ayblovlarni bekor qilishlari kerakligini bildirgan. Uning so‘zlariga ko‘ra, Adliya vazirligi tergov olib borgan prokurorlarning halolligi va sa’y-harakatlarini shubha ostiga qo‘ymaydi, shuningdek, ularning taqdim etgan dalillarini ham inkor etmaydi. Biroq tergov Nyu-York merining noqonuniy immigratsiya va shaharda zo‘ravonlik jinoyatlariga qarshi kurashishiga to‘sqinlik qilgani sababli yopilishi lozim deb topilgan. 

north_east

Nyu-York meriga qo‘yilgan ayblovlar. O‘zbekistonlik tadbirkor bunga aloqadormi?

Emil Bove, shuningdek, Erik Adamsga qarshi ayblovlar Nyu-York meri uchun bo‘ladigan saylovlardan keyin qayta ko‘rib chiqilishi mumkinligini bildirgan. Ushbu saylovlar joriy yil noyabr oyida o‘tkaziladi.

Ma’lumot uchun, ayblovlarni olib tashlash to‘g‘risidagi qaror hali  prokurorlar tomonidan rasmiy ravishda taqdim etilishi va ishni nazorat qiluvchi sudya tomonidan tasdiqlanishi kerak.

Eslatib o‘tamiz, 2024 yil sentyabr oyida Erik Adams pora olish, pul o‘tkazmalarida firibgarlik va noqonuniy saylov kampaniyasi mablag‘larini qabul qilishda ayblangan edi. Uning rezidensiyasida qidiruv ishlari o‘tkazilgan. Prokuratura ma’lumotlariga ko‘ra, u deyarli 10 yil davomida noqonuniy moddiy manfaatlar olgan, jumladan, badavlat xorijlik tadbirkorlar tomonidan ham qo‘llab-quvvatlangan. 2024 yil oktyabr oyidagi so‘rovnomalarga ko‘ra, Nyu-York aholisining 69 foizi Erik Adamsning iste’fosini talab qilgan.