MYUning APLdagi g‘alabali seriyasi yakunlandi

Kecha, 10 fevral kuni Londonning “Vest Xem” jamoasi Angliya Premer-ligasi 26-turi doirasida “Manchester Yunayted”ni qabul qildi. Uchrashuv 1:1 hisobidagi durang natija bilan yakunlandi.

Dastlab o‘yinning 50-daqiqasida mezbonlar safida Tomash Souchek gol urib, jamoasini hisobda oldinga olib chiqdi. Shundan so‘ng “qizil iblislar” hujumlarni kuchaytirib, hisobni tenglashtirish uchun harakat qildi. O‘yinning asosiy vaqtiga qo‘shib berilgan 90+6-daqiqada Benjamin Sheshkoning goli evaziga “Manchester Yunayted” hisobni tenglashtirishga muvaffaq bo‘ldi.

Shu tariqa, “Manchester Yunayted”ning to‘rt o‘yinlik g‘alabali seriyasiga yakun yasaldi. Maykl Kerrik boshqaruvidagi jamoa Angliya Premer-ligasi turnir jadvalida 45 ochko bilan to‘rtinchi o‘rinda bormoqda. “Vest Xem” esa 24 ochko bilan 18-pog‘onani egallab turibdi.

“Manchester Yunayted” navbatdagi uchrashuvini joriy yilning 23 fevral kuni safarda Liverpulning “Everton” jamoasiga qarshi o‘tkazadi. “Vest Xem” esa 21 fevral o‘z maydonida “Bornmut”ni qabul qiladi.