MYUga o‘tganimda o‘lim tahdidlari bo‘lgan – Ueyn Runi

Angliya terma jamoasining sobiq hujumchisi Ueyn Runi 2004 yilda “Everton”dan “Manchester Yunayted”ga o‘tgan paytida o‘lim tahdidlariga duch kelganini ma’lum qildi. Bu haqda ESPN nashri xabar berdi.

Runi bu transfer vaqtida endigina 18 yoshda bo‘lgan. U 27 million funt sterling (taxminan 36 million dollar) evaziga “Manchester Yunayted”ga ko‘chib o‘tgan va Mersisayd klubi taklif qilgan rekord yangi shartnomani rad etgan. Shundan so‘ng bu holat “Everton” muxlislarining keskin noroziligiga sabab bo‘lgan.

“Menga o‘lim tahdidlari kelib tushgan. Ota-onamning uyi vayron qilingan, hozirgi rafiqam – o‘sha paytdagi qiz do‘stimning uyi esa bo‘yoq bilan bulg‘angan edi. Bunday vaziyatda ruhiy jihatdan kuchli bo‘lish va atrofdagilarning ko‘magiga tayanish juda muhim bo‘lgan”, deydi Runi.

Runi transferning og‘irligini Liverpul va Manchester shaharlari o‘rtasidagi tarixiy raqobat yanada kuchaytirganini ta’kidladi.

“Ketish qiyin bo‘ldi, chunki bu shaharlar o‘rtasida raqobat kuchli bo‘lgan. “Manchester Yunayted”ga o‘tishim bu raqobat vaziyatni yanada murakkablashtirdi. Ammo men doim o‘z maqsadimni bilardim va unga erishish uchun qat’iyatli bo‘lishim kerak edi”, dedi u.

Ma’lumot uchun, Ueyn Runi “Manchester Yunayted” safida 13 mavsum to‘p surib, 5 marta APL chempioni bo‘lgan hamda Chempionlar Ligasi va boshqa ko‘plab sovrinlarni qo‘lga kiritgan.