МЮга ўтганимда ўлим таҳдидлари бўлган – Уэйн Руни

Англия терма жамоасининг собиқ ҳужумчиси Уэйн Руни 2004 йилда “Эвертон”дан “Манчестер Юнайтед”га ўтган пайтида ўлим таҳдидларига дуч келганини маълум қилди. Бу ҳақда ESPN нашри хабар берди.

Руни бу трансфер вақтида эндигина 18 ёшда бўлган. У 27 миллион фунт стерлинг (тахминан 36 миллион доллар) эвазига “Манчестер Юнайтед”га кўчиб ўтган ва Мерсисайд клуби таклиф қилган рекорд янги шартномани рад этган. Шундан сўнг бу ҳолат “Эвертон” мухлисларининг кескин норозилигига сабаб бўлган.

“Менга ўлим таҳдидлари келиб тушган. Ота-онамнинг уйи вайрон қилинган, ҳозирги рафиқам – ўша пайтдаги қиз дўстимнинг уйи эса бўёқ билан булғанган эди. Бундай вазиятда руҳий жиҳатдан кучли бўлиш ва атрофдагиларнинг кўмагига таяниш жуда муҳим бўлган”, дейди Руни.

Руни трансфернинг оғирлигини Ливерпуль ва Манчестер шаҳарлари ўртасидаги тарихий рақобат янада кучайтирганини таъкидлади.

“Кетиш қийин бўлди, чунки бу шаҳарлар ўртасида рақобат кучли бўлган. “Манчестер Юнайтед”га ўтишим бу рақобат вазиятни янада мураккаблаштирди. Аммо мен доим ўз мақсадимни билардим ва унга эришиш учун қатъиятли бўлишим керак эди”, деди у.

Маълумот учун, Уэйн Руни “Манчестер Юнайтед” сафида 13 мавсум тўп суриб, 5 марта АПЛ чемпиони бўлган ҳамда Чемпионлар Лигаси ва бошқа кўплаб совринларни қўлга киритган.