Murod Rajabov vafot etdi

Aktyor Murod Rajabov bugun, 8 aprel kuni uzoq xastalikdan so‘ng 74 yoshida vafot etdi. Bu haqda O‘zbekiston Kinematografiya agentligi xabar berdi.

Avvalroq xastalik sababli uzoq vaqt ko‘rinish bermagan aktyor “Kinematografiya fidokori” ko‘krak nishoni bilan taqdirlangandi. O‘shanda jurnalist Shohira Hamro ijtimoiy tarmoqlardagi sahifasi orqali jonli efirga chiqib, ko‘plab kino ixlosmandlarining salom va tabriklarini aktyorga yetkazgandi. 

Ma’lumot o‘rnida, Murod Rajabov 1949 yilning 30 may kuni Toshkent shahrida tug‘ilgan. 1971 yilda Toshkent san’at institutini tamomlagan aktyor faoliyati davomida o‘zbek xalqi uchun qadrdon bo‘lib qolgan, qator kinofilmlarda suratga tushgan. Jumladan, “Ajoyib xayolparast”, “To‘ylar muborak”, “Temir xotin”, “Temir erkak”, “Kichkina tabib”, “Ko‘zlaring ma’yus”, “Ulfatlar”, “Kelgindi kuyov”, “Xavfli burilish”, “Kechir”, “Super kelinchak”, “Ichkuyov”, “Kirakash” kabi filmlar bunga misol. Murod Rajabov 2008 yilda O‘zbekiston xalq artisti unvoni bilan taqdirlangan.

Nodirjon Madaminov