“Mossad” Xoniyani o‘ldirish uchun Eron razvedkasi agentlarini yollagan – “Telegraph”

Isroil razvedka xizmati “Mossad” Eron xavfsizlik xizmati xodimlarini Falastinning HAMAS harakati Siyosiy byurosi rahbari Ismoil Xoniya istiqomat qilayotgan Tehrondagi mehmon uyiga portlovchi moslamalarni joylashtirish uchun yollagan. Bu haqda manbalariga tayanib, Britaniyaning “The Daily Telegraph” gazetasi xabar berdi.

31 iyul kuni HAMAS Tehrondagi qarorgohiga Isroil tomonidan uyushtirilgan zarba oqibatida Xoniya halok bo‘lganini e’lon qildi.

Amerikaning “The New York Times” gazetasi Xoniya ikki oy oldin Tehrondagi qarorgohida o‘rnatilgan bomba portlashi oqibatida halok bo‘lgan bo‘lishi mumkinligini da’vo qildi. Uning manbalariga ko‘ra, portlovchi qurilma Xoniya o‘z xonasida paydo bo‘lganidan keyin masofadan turib ishga tushirilgan.

“Axios” portaliga ko‘ra, “Mossad” Xoniyani o‘ldirish bo‘yicha operatsiyani tashkil qilish uchun javobgardir.

“The Daily Telegraph” nashrining yozishicha, “Mossad” dastlab Xoniyani may oyida aviahalokatda halok bo‘lgan Eron prezidenti Ibrohim Raisiy dafn marosimida qatnashayotganida yo‘q qilmoqchi bo‘lgan. Biroq, binoda ko‘p sonli mehmonlar borligi va operatsiyaning muvaffaqiyatsiz bo‘lish xavfi yuqoriligi sababli bu rejalardan voz kechishga qaror qilindi.

Qayd etilishicha, Xoniya qarorgohiga portlovchi moslama o‘rnatgan Eron razvedkasining ikki agenti darhol mamlakatni tark etgan. Ammo ular Tehrondagi manbalari bilan aloqada bo‘lgan va shuning uchun HAMAS yetakchilaridan birining navbatdagi tashrifidan xabar topgan.

Nashrning qayd etishicha, bombalar uyning uchta xonasiga o‘rnatilgan. Buning uchun “Mossad” Islom inqilobi qo‘riqchilari korpusining yuqori mansabdor shaxslarning xavfsizligini ta’minlash uchun javobgar bo‘lgan “Ansor al-Mahdiy” bo‘linmasidan agentlarni yollagan.

Eslatib o‘tamiz, oldinroq Tehronda Ismoil Xoniyaning o‘ldirilishida gumon qilinayotgan 20 kishi hibsga olingani xabar qilingandi.