Moskvada Wi-Fi tarmog‘iga “Slava Ukraїna!” deb nom bergan talaba qamaldi

Moskvaning Nikulinskiy tuman sudi o‘zining Wi-Fi tarmog‘i nomi sifatida “Slava Ukraїna!” (Ukrainaga shon-sharaf!) so‘zini qo‘ygan Moskva davlat universitetining 22 yoshli talabasi Oleg Tarasovni 10 sutkaga ma’muriy hibsga oldi. Bu haqdagi qaror Moskva sudlarining ma’lumotlar bazasida e’lon qilindi. 

Oleg Tarasov ekstremistik belgilarni omma oldida namoyish qilishda aybdor deb topilgan (Rossiya Federatsiyasi Ma’muriy javobgarlik to‘g‘risidagi kodeksining 20.3-moddasi). Sud qarori shu yilning 7 mart kuni e’lon qilingan. 

“Ukrainaga shon-sharaf!” shiori yaqinda yaratilgan "fashistik tashkilotlar" va ularning atributlari reyestriga kiritilgan. Wi-Fi routeri jinoyat quroli sifatida musodara qilingan.

Gap shundaki, Rossiya Federatsiyasi Ichki ishlar vazirligining Ekstremizmga qarshi kurash bosh boshqarmasi xodimlari 6 mart kuni Moskva davlat universiteti bosh binosi yaqinidagi talabalar yotoqxonasidan shunday nomdagi Wi-Fi tarmog‘ini topib, talaba ustidan bayonnoma tuzgan. 

Politsiya 2023 yil oktyabr oyida Tarasov yangi router sotib olganini va “Slava Ukraїna!” deb nomlangan tarmoqni yaratganini aniqlagan. Sudda talaba tarmoqni o‘zi tashkil qilganini tan olgan.

Politsiyaga ko‘ra, Tarasov bu nomni "Ukraina millatchilari shiorini targ‘ib qilish uchun" qo‘ygan.