Moskvada hibsga olingan amerikalik qo‘yib yuborildi

Moskvaning Vnukovo aeroportida yukida nasha solingan marmelad borligi uchun hibsga olingan AQSH fuqarosi Kalob Bayers Rossiya tergov hibsxonasidan ozod etildi. Bu haqda Bayersning ota-onasi Facebook'da ma’lum qildi.

Ularning aytishicha, Kalob Bayers Amerika elchixonasida bo‘lib, uyiga qaytishni kutmoqda. Bildirilishicha, sakkiz kun davomida uning yoniga kirishga ruxsat berilmagan. 8 kundan keyingina Bayers epilepsiya dori-darmonlarini qayta qabul qila boshlagan.

Amerika fuqarosining ozod etilishi haqida Rossiya tomonidan hozircha rasmiy izoh berilgani yo‘q. AQSHning Moskvadagi diplomatik vakolatxonasi ham hech narsa demadi.

28 yoshli musiqachi Kalob Bayers 7 fevral kuni Vnukovoda hibsga olingan. Uning yukida kannabinoidlar o‘simligining qo‘shimcha mahsuloti bo‘lgan marmelad o‘rami borligi aniqlangan. Bayersning ota-onasining aytishicha, ularning o‘g‘li tutqanoqlarini nazorat qilish uchun konfet oladi.

Bayers bilan birga uning kelini, Rossiya fuqarosi Naida Mambetova qo‘lga olingan. Ularning har ikkisi ham uch kundan keyin giyohvand moddalar kontrabandasida ayblanib hibsga olingan. Mambetova bilan nima sodir bo‘layotgani hozircha noma’lum

AQSH fuqarosi Kalob Bayersning hibsga olingani oldinroq Rossiyada nasha kontrabandasida ayblangan yana bir amerikalik Mark Fogel AQSHda qamalgan Rossiya fuqarosi Aleksandr Vinnikka almashtirganidan keyin ma’lum bo‘ldi.