Mirziyoyevni Nazarboyev ham tabrikladi

O‘zbekiston Prezidenti Shavkat Mirziyoyev va Qozog‘istonning birinchi rahbari Nursulton Nazarboyevning telefon orqali muloqoti bo‘lib o‘tdi. Bu haqda Prezident Matbuot xizmati xabar berdi.

Ma’lum qilinishicha, Qozog‘istonning birinchi Prezidenti O‘zbekiston rahbarini kuni kecha mamlakatda bo‘lib o‘tgan muddatidan ilgari Prezident saylovidagi g‘alabasi bilan samimiy qutlagan.

Shuningdek, O‘zbekiston bilan Qozog‘iston o‘rtasidagi yaxshi qo‘shnichilik, strategik sheriklik va ittifoqchilik munosabatlari izchil rivojlanib borayotgani katta mamnuniyat bilan qayd etilgan.

“Bugungi kunda hamkorlik barcha yo‘nalishlarda, shu jumladan savdo-iqtisodiyot, investitsiya, energetika, transport-logistika, madaniy-gumanitar va ta’lim sohalarida jadal rivojlanib bormoqda”, deyiladi xabarda.

Avvalroq Prezident Shavkat Mirziyoyevni saylovdagi g‘alabasi bilan Rossiya, Turkmaniston, Qozog‘iston, Turkiya, Ozarbayjon, Qirg‘iziston va Tojikiston rahbarlari ham tabrikladi.

Eslatib o‘tamiz, kecha, 9 iyul kuni O‘zbekistonda navbatdan tashqari prezidentlik saylovi bo‘lib o‘tdi. Natijalarga ko‘ra, O‘zbekiston Respublikasi Prezidenti etib O‘zbekiston Liberal-demokratik partiyasidan Shavkat Miromonovich Mirziyoyev 87,05 foiz ovoz bilan 7 yil muddatga saylandi.