Mirziyoyev FVV rahbari nega ishdan olinganini aytdi

O‘tgan haftada 2022 yildan beri favqulodda vaziyatlar vaziri bo‘lib ishlab kelgan general-mayor Abdulla Qo‘ldoshev ishdan olingandi. Bugun, 5 mart kuni Prezident Shavkat Mirziyoyev Senatda bo‘lib o‘tayotgan yig‘ilishda u va uning o‘rinbosarlari ishdan olinganining sababini aytdi.

Ma’lum qilinishicha, qurilishga ruxsat berish, binoni topshirishda yong‘in xavfsizligi bo‘yicha byurokratiya va qonun buzilish ko‘payib ketgani uchun o‘tgan hafta favqulodda vaziyatlar vaziri va uning o‘rinbosarlari ishdan olingan.

Shuningdek, Prezident aholiga yer berish jarayonida fuqarolar hokim va o‘nga yaqin idoralar o‘rtasida sarson bo‘lib yurgani va bu soha korrupsiya “o‘chog‘i”ga aylanganini aytdi. Endilikda esa yerni hokim qarori bilan ajratishdan to‘liq voz kechilib, auksion tizimiga o‘tilgani natijasida bu tizim xalqchil bo‘ldi.

Bundan tashqari, qurilish sohasi ham eng korrupsiyalashgan sohalardan biri edi. “Shaffof qurilish” dasturi joriy etilganidan keyin bu yo‘nalishda ham ijobiy o‘zgarishlar sezilmoqda.

Ilgari investitsiya dasturiga kirgan ob’ektlarni quradigan pudratchilar mingtaga ham yetmasdi. O‘tgan yili 13,5 mingta ob’ekt qurilishida 4 mingdan ziyod pudratchi ishtirok etdi. Soha raqamlashgani hisobiga o‘tgan 4 yilda 3,6 trillion so‘m byudjet mablag‘i tejaldi.

Eslatib o‘tamiz, o‘tgan haftada O‘zbekiston Respublikasi Prezidentining farmoni bilan Botir Bahromovich Qudratxo‘jayev O‘zbekiston Respublikasi Favqulodda vaziyatlar vaziri lavozimiga tayinlangandi. Unga general-mayor unvoni ham berildi. kecha, 4 mart kuni Xurshid To‘lqinboyevich Sotiyev O‘zbekiston Respublikasi Favqulodda vaziyatlar vazirining o‘rinbosari – Favqulodda vaziyatlar profilaktikasi departamenti boshlig‘i vazifasini bajaruvchi lavozimiga, Nuriddin Bahriddinovich Qodirov O‘zbekiston Respublikasi Favqulodda vaziyatlar vazirining o‘rinbosari – Ma’naviy-ma’rifiy ishlar va kadrlar bilan ta’minlash departamenti boshlig‘i vazifasini bajaruvchi lavozimiga tayinlandi.