Miraziz Bozorovga oid sud ma’lumotlari sir saqlanadi – Tashanov

Jabrlanuvchilarning iltimosiga ko‘ra, Miraziz Bozorovga nisbatan qo‘zg‘atilgan jinoyat ishi sud majlisiga oid ma’lumotlar va jabrlanuvchilarning shaxsi sir saqlanadi. Bu haqda Inson huquqlari himoyachisi – “Ezgulik” jamiyati raisi Abdurahmon Tashanov QALAMPIR.UZ’ga ma’lum qildi. 

“Jabrlanuvchilarning iltimosiga ko‘ra, ularning shaxsi, sudga oid ma’lumotlar sir saqlanadigan bo‘ldi. Sudning qonuniy humki kuchga kirganidan keyin, bular haqida gapiriladi. 

Chunki ular haqiqatan ham jamoatchilikka taniqli shaxslar. Shuning uchun ham sud shunday qarorga keldi”, deydi Tashanov. 

Uning qayd etishicha, hozircha sud jarayonida protsessual buzilishlar aniqlanmagan. 

Shuningdek, sud hali uzoq davom etishi ma’lum qilindi. 

Eslatib o‘tamiz, bugun, 20 yanvar kuni Jinoyat ishlari bo‘yicha Mirobod tumani sudida Miraziz Bozorovga nisbatan qo‘zg‘atilgan jinoiy ishni ko‘rib chiqish bo‘yicha sud ishi boshlandi. Sudda O‘zbekiston Musulmonlari idorasining "Qur’oni karim va tajvidni o‘rgatish" bo‘limi mudiri o‘rinbosari Abror Abduazimov (Abror Muxtor Aliy) va bloger Shuhrat Musayev jabrlanuvchi sifatida ishtirok etmoqda. 

Shuningdek, sud majlisida xalqaro tashkilotlar vakillari, xususan Germaniya elchixonasi xodimlari ham ishtirok etmoqda. Ularning ichkariga kirishiga hech qanday to‘sqinlik qilinmagan, PZR-test manfiy javobi ham so‘ralmagan. Holbuki, jurnalistlardan ichkariga kirish uchun hech qanday asossiz PZR-test talab qilingan. 

Miraziz Bozorov ishi 

2021 yilning 11 mart kuni Miraziz Bozorov TikTok’dagi sahifasi orqali LGBT himoyachilariga murojaat bilan chiqib, har juma Hazrati Imom majmuasi joylashgan maydonda to‘planish va LGBT huquqlarini himoya qilish taklifini bildirgan edi. 

28 mart kuni soat 15:00 atrofida poytaxt Toshkentning Amir Temur xiyoboni atrofida jinoyat kodeksidan besoqolbozlik moddasini chiqarib yuborilishiga qarshi jamoatchilik vakillarining norozilik namoyishi bo‘lib o‘tdi. Toshkent shahar IIBBga ko‘ra, 3-4 nafar fuqarolar T.S. ismli yigit va B.R. ismli qizni LGBT faollari deb gumonlab, ularni urishga harakat qilgan. Ushbu fuqarolarga 20-25 nafar boshqa shaxslar qo‘shilib, jamiyatda yurish-turish qoidalarini qasddan mensimasdan, bezorilik harakatlarini sodir etgan. Voqea joyida xizmat qilayotgan Toshkent shahar IIBB va Milliy gvardiya xodimlarining aralashuvi bilan T.S. va B.R. himoya qilinib, ularga tan jarohati yetkazilishiga yo‘l qo‘yilmagan. Janjalni boshlagan va faol ishtirokchisi bo‘lgan fuqarolarning 12 nafari ushlangan.

Shuningdek, 28 mart kuni taxminan soat 22:45 larda Mirobod tumani Afrosiyob ko‘chasi 21-uy oldida 3 nafar noma’lum shaxslar 1991 yilda tug‘ilgan Bozorov Miraziz Mirzajon o‘g‘lini urib, tan jarohatlari yetkazgan va voqea joyidan noma’lum tarafga yashiringan. Olgan tan jarohatlari bilan Miraziz Bozorov shifoxonaga yotqizilgan.

Tibbiyot muassasasidan olingan ma’lumotga ko‘ra, ushbu fuqaroda bosh miya ochiq va yopiq jarohatlari, o‘ng qosh sohasi yirtilgan jarohati, ko‘krak qafasi va qorin sohasi yumshoq to‘qimalari lat yeyishi, o‘ng oyoq boldir suyagi ochiq sinishi jarohatlari qayd etilgan.

Mazkur holat yuzasidan Mirobod tumani IIO FMB Tergov bo‘limi tomonidan O‘zbekiston Respublikasi Jinoyat kodeksining 105-moddasi 2-qismi “i” bandi (“Qasddan badanga o‘rtacha og‘ir shikast yetkazish”) alomatlari bilan jinoyat ishi qo‘zg‘atilgan.

2021 yilning 1 aprel kunidan 20 aprelga qadar Toshkent shahar IIBBga fuqarolardan 28 ta ariza kelib tushgan bo‘lib, unda Miraziz Bozorov internetda joylagan videolarida ushbu fuqarolarni va ularning qarindoshlarini haqorat qilgani, ularni terroristik tashkilotlar bilan hamkorlikda ayblab tuxmat qilgani, milliy an’analarni oyoq osti qilib, ayollarning sha’niga putur yetkazayotgani hamda millatlararo nizo uyg‘otayotgani sababli unga nisbatan qonuniy chora ko‘rishni talab qilgan. 

Shuningdek, Mirobod tumani 110-son umumta’lim o‘rta maktabi o‘qituvchilaridan jamoaviy ariza kelib tushgan bo‘lib, unda Internet tarmog‘idagi mediamakonlarda mazkur maktab o‘qituvchilarining kasbiy va shaxsiy sifatlari haqida haqoratli ma’lumotlar tarqatgani va shu bilan ularning obro‘sini toptagani uchun Miraziz Bozorovga nisbatan qonuniy chora ko‘rishni so‘ragan.

Tergovga qadar tekshiruv natijalariga ko‘ra, Bazarov Mirazizning xatti-harakatlarida O‘zbekiston Respublikasi Jinoyat kodeksining 139-moddasi 3-qismi “g” bandida (“G‘arazgo‘ylik yoki boshqa past niyatlarda tuhmat qilish, ya’ni bila turib boshqa shaxsni sharmanda qiladigan uydirmalar tarqatish”) nazarda tutilgan jinoyat alomatlari borligi aniqlanib jinoyat ishi qo‘zg‘atildi.

Voqealar avjiga chiqqan bir paytda Human Rights Watch xalqaro inson huquqlari tashkiloti rasmiy Toshkentga yangi tahrirdagi jinoyat kodeksidan besoqolbozlik moddasini chiqarib tashlashni so‘rab, murojaat kiritgan edi. Ayni vaqtda mazkur masala siyosat va din vakillari, jamoatchilik orasida ko‘plab muhokamalarga sabab bo‘ldi. Deputat Rasul Kusherboyev birinchilardan bo‘lib Human Rights Watch’ning talabiga qarshi chiqdi. Vazirlar Mahkamasi huzuridagi Islom sivilizatsiyasi markazi Jamoatchilik bilan aloqalar bo‘limi bosh mutaxassisi Abror Muxtor Aliy esa QALAMPIR.UZ’ga bergan intervyusida xalqaro tashkilotning O‘zbekistonga yo‘llagan ushbu murojaati va talabi davlat va xalq o‘rtasida nizo keltirib chiqarishga qaratilganini urg‘uladi. Oliy Majlis Qonunchilik palatasi spikerining o‘rinbosari Alisher Qodirov esa mmmaviy tartibsizliklar orqali diniy cheklovlar o‘rnatilishidan manfaatdorlar borligini aytib chiqdi.