“Milliy tiklanish” Hukumatga “tonirovka” bo‘yicha jiddiy taklif tayyorladi

O‘zbekistonda avtomobil oynalarini qoraytirish uchun maxsus ruxsatnoma talab etilishi hamda buning uchun to‘lovning yuqoriligi o‘tgan yillar davomida yetarlicha va ortig‘i bilan muhokama qilindi. Va bu borada parlament quyi palatasining ayrim deputatlari tomonidan orqa oyna tusini bepul o‘zgartirish, shuningdek, agar avtomobilning ikki yonida orqa tomonni ko‘rish uchun ko‘zgu bo‘lsa, pardalarni (chiyparda, darpardalar) ilish mumkinligiga erishildi.

Ammo bu masalaning yechimi emas. Chunki gap avtomobilning faqat orqa va orqa yon oynalari haqida emas, barchasiga birdek taalluqlidir. Chunki avtomobil salonida eng avvalo haydovchi uchun qulaylik yaratish zarur.

“Milliy tiklanish” demokratik partiyasi Hukumatga avtomobil oynasi tusini o‘zgartirish uchun to‘lovlarni bekor qilish bo‘yicha taklif kiritmoqchi.

“O‘zbekiston “Milliy tiklanish” demokratik partiyasi yurtdoshlarimizga qulaylik yaratish hamda mutaxassislarning xulosasiga ko‘ra fuqarolarning quyoshning ultrabinafsha nurlaridan teri saratoni kasaliga chalinishlarining oldini olish, avtomobil konditsionerlarini kamroq ishlatilishiga va buning natijasida yonilg‘i kamroq sarflanib, atrof-muhitga zararli moddalarning kamroq chiqishiga, pirovardida ekologiyani asrashga erishish maqsadida avtomobil oynalari tusini o‘zgartirish uchun belgilangan to‘lovlarni bekor qilish, zarur deb hisoblaydi.

Buning uchun partiyaning Oliy Majlis Qonunchilik palatasidagi fraksiyasi va xalq deputatlari Mirzo Ulug‘bek tuman Kengashidagi O‘zMTDP guruhi tomonidan Vazirlar Mahkamasiga hukumatning 2020 yil 2 avgustdagi “Tusi o‘zgartirilgan (qoraytirilgan) oynali avtotransport vositalaridan foydalanishni tartibga solish bo‘yicha qo‘shimcha chora-tadbirlar to‘g‘risida”gi 646-sonli qaroriga tegishli o‘zgartirish kiritish bo‘yicha taklif tayyorlandi.

Zero, mamlakatimizda inson manfaatlari hamma narsadan ustun. Bosh Qomusimizda belgilanganidek, Davlat xalq irodasini ifoda etib, uning manfaatlariga xizmat qiladi”, deyiladi partiya axborotida.

Eslatib o‘tamiz, bugungi kunda o‘z avtomobili oynalarini qoraytirmoqchi bo‘lgan fuqarolar bir yil muddat uchun O‘zbekiston Respublikasi Vazirlar Mahkamasining 2019 yil 2 avgustdagi qaroriga asosan, orqa va old yon oynalar uchun Bazaviy hisoblash miqdorining 50 baravari (11 150 000 so‘m), orqa yon oynalar uchun BHMning 10 baravari (2 230 000 so‘m) miqdorida to‘lovni amalga oshirishlari zarur.

Mazkur to‘lov miqdorining yuqoriligi bois, bugungi kunda ayrim fuqarolargina avtomobil oynalari tusini o‘zgartirgan. 2019 yil statistikasiga ko‘ra, ular jami avtomobillar sonining 0,1 foizini ham tashkil qilmagan.