Messi Amerika kubogi o‘yinida Argentinaga yordam bera olmaydi

Futbol bo‘yicha Argentina terma jamoasi sardori Lionel Messi Amerika kubogi guruh bosqichining so‘nggi turida Peru termasiga qarshi o‘yinni o‘tkazib yuboradi. Bu haqda futbol jurnalisti Gaston Edul X sahifasida ma’lum qildi.

37 yoshli hujumchi o‘ng oyog‘ining mushaklari shikastlangani uchun tibbiy ko‘rikdan o‘tgan. Futbolchi guruh bosqichi 2-turidan o‘rin olgan Chili terma jamoasiga qarshi o‘yinda (1:0) o‘zini noqulay his qilgani aniq bo‘ldi.

Manbaga ko‘ra, Messi 29 iyun kuni yana tibbiy ko‘rikdan o‘tadi, shundan so‘ng u terma jamoa safiga qo‘shiladi. 

Qayd etilishicha, futbolchi jamoa guruh bosqichining ikki turidan so‘ng yetib kelgan turnirning 1/4 finaliga yaxshiroq tayyorgarlik ko‘rish maqsadida 29 iyun kuni Peru terma jamoasiga qarshi o‘yinni o‘tkazib yuboradi.

Amaldagi jahon chempioni va Amerika kubogi sohibi Argentina terma jamoasi 6 ochko bilan “A” guruhida peshqadamlik qilmoqda. Keyingi o‘rinlarni Kanada (3 ochko), Chili (1) va Peru (1) terma jamoalari band etgan.