Menga hozir raqibning farqi yo‘q – Murodjon Ahmadaliyev

Bugun, 15 dekabr kuni Amerikaning Las-Vegas shahrida o‘zbekistonlik professional bokschi, sobiq WBA va IBF kamarlari sohibi Murodjon Ahmadaliyev bo‘lajak jangi oldidan meksikalik raqibi Kevin Gonsales bilan matbuot anjumani va face-to-face marosimida qatnashdi. 

Mabuot anjumanida Ahmadaliyev raqibi haqida o‘z fikrlari bilan o‘rtoqlashdi.

“Albatta, meni faoliyatimdagi muhim janglardan biri kutib turganini his etib turibman. Eliminator jangi g‘olibi chempionlik kamari uchun ringga chiqish huquqini qo‘lga kiritadi. Tayyorgarlik ham shunga monand tarzda bo‘ldi. To‘g‘ri, mashg‘ulot jarayonida yonimda Shahram G‘iyosov, Bahodir Jalolov, Bektemir Meliqo‘ziyev, Isroil Madrimov, Elnur Abduraimov kabi do‘stlarim to‘liq bo‘lmadi. Lekin ular bilan har kuni gaplashib turdik. Murabbiylarim bilan birgalikda reja asosida tayyorgarlik ko‘rdik. Raqib meksikalikligining o‘zi ko‘p narsadan darak beradi. Meksikaliklar zarbalarga chidamli bo‘lishadi. Ammo menga hozir raqibning farqi yo‘q. Chempionlik kamarlarini qaytarib olish uchun astoydil ishga kirishganman. Bu yo‘lda birinchi navbatda Gonsalesni mag‘lub etishim kerak. Xalqimiz duo qilib tursa, hammasi yaxshi bo‘ladi. Ularni xursand etish uchun borimni beraman”, deydi Ahmadaliyev.

Ma’lumot uchun, Ahmadaliyevning jangi 17 dekabr tongida AQSHning Arizona shtatida joylashgan “Desert Diamond” arenada o‘tkaziladi.