MDHga raislik Tojikistonga o‘tdi. Imomali Rahmon nimani o‘zgartirmoqchi?

2025 yil 1 yanvardan MDHga raislik Rossiyadan Tojikistonga o‘tadi, bu qaror kecha, 8 oktyabr kuni Hamdo‘stlik davlat rahbarlarining sammitida qabul qilindi. Bu haqda Tojikiston Prezidenti matbuot xizmati xabar berdi.

Prezident Imomali Rahmon Moskvadagi sammitda so‘zga chiqib, Tojikistonning MDHga raisligining ustuvor yo‘nalishlarini taqdim etdi. Uning so‘zlariga ko‘ra, Tojikiston Respublikasi raisligining asosiy ustuvor yo‘nalishlaridan biri Hamdo‘stlik faoliyatini takomillashtirish masalasi bo‘yicha muhokamani boshlash bo‘ladi. Siyosiy jihatdan MDHning mintaqaviy birlashma sifatida jahon miqyosida ijobiy imijini rivojlantirish bo‘yicha ishlar davom ettiriladi.

Shuningdek, u iqtisodiy, ekologik, madaniy-gumanitar masalalarni ilgari surishga ham alohida e’tibor qaratishini ta’kidladi.

Tojikiston Prezidenti Ikkinchi jahon urushidagi g‘alabaning 80 yilligini nishonlashga jiddiy e’tibor qaratishini ma’lum qildi. Parlament hamkorligini rivojlantirish ham muhim ustuvor yo‘nalish sifatida belgilandi.

Imomali Rahmon xavfsizlik sohasida xavf va tahdidlarga qarshi kurashda amaliy hamkorlikni mustahkamlashga alohida e’tibor qaratishini ta’kidladi. U o‘z so‘zi yakunida joriy uchrashuvda qabul qilingan qarorlar barcha sohalarda ko‘p tomonlama hamkorlikka turtki berishiga ishonch bildirdi.

Rossiya Prezidenti Vladimir Putin sammitda so‘zga chiqib, Tojikiston rahbariga mamlakatining MDHga raisligida unga yordam berishga va’da berdi.

“Rossiyadan keyin MDHga raislik 2025 yil 1 yanvardan tojikistonlik do‘stlarimizga o‘tadi. Tojikiston Prezidenti Imomali Sharipovich Rahmon va Tojikistondagi barcha hamkasblarimizga muvaffaqiyatlar tilab qolamiz. Biz o‘z kuchimiz bilan barcha zarur yordamni beramiz", dedi Putin.

Shuningdek, u MDH doirasidagi o‘zaro hamkorlik Rossiya tashqi siyosatining ustuvor yo‘nalishlaridan biri ekanligini ta’kidladi.

"Biz uchun Hamdo‘stlik mamlakatlari eng yaqin qo‘shnilarimiz, do‘stlarimiz, strategik hamkorlarimiz va biz hamkorligimizni har tomonlama mustahkamlash tarafdorimiz. Masalan, jahon bozorlaridagi o‘zgaruvchanlikka qaramay, Rossiyaning MDH davlatlari bilan tovar ayirboshlash hajmi atigi yetti oy ichida ajoyib 7,7 foizga o‘sib, 63,2 milliard dollarni tashkil etdi", dedi Rossiya Federatsiyasi Prezidenti.

Moskvadagi sammitda qatnashgan Belaruslik Aleksandr Lukashenko esa “MDH oilasi”ni avvalgi tarkibiga qaytarishni xohlashini aytdi.

“Agar Gruziya bizning oilamizga qaytsa, Moldova to‘liq ishtirokini tiklasa, juda yaxshi bo‘lardi, Ukraina rasmiylari o‘zlariga kelishsa, normal hayotni tiklashda biz ishtirok etishimiz kerak bo‘ladi. Bu sodir bo‘lishiga to‘liq ishonaman. Bu vaqt masalasi", dedi u.

Lukashenko mamlakatlar Hamdo‘stlikda bor narsalarini qadrlashi kerakligini ta’kidladi.

Eslatib o‘tamiz, kecha, 8 oktyabr kuni Mustaqil Davlatlar Hamdo‘stligiga a’zo davlatlar rahbarlari O‘zbekiston Prezidenti Shavkat Mirziyoyev tashabbusi bilan ilgari surilgan 2025–2027 yillarga mo‘ljallangan deradikalizatsiya sohasida hamkorlik dasturini qabul qilgandi.