Belarus MSK Lukashenkoni prezidentlikka nomzod sifatida ro‘yxatga oldi

Belarus Markaziy saylov komissiyasi mamlakatda 30 yildan beri hukmronlik qilib kelayotgan Aleksandr Lukashenkoni prezident lavozimiga nomzod sifatida ro‘yxatga oldi. Bu haqda MSK xabar berdi.

Mamlakatda prezidentlikka nomzodlar sifatida quyidagilar ro‘yxatga olingan (tashabbus guruhlari MSKga hujjatlarni topshirish tartibida):

• Sergey Aleksandrovich Sirankov, 

• Aleksandr Nikolayevich Xijnyak, 

• Oleg Sergeyevich Gaydukevich, 

• Anna Anatolevna Kanopatskaya, 

• Aleksandr Grigorevich Lukashenko.

Prezidentlikka nomzodlarni ro‘yxatga olish yig‘ilish kun tartibidagi asosiy masala bo‘ldi. 2025 yilgi saylovga tayyorgarlik ko‘rish va o‘tkazish bo‘yicha kalendar rejasiga muvofiq bu tartib 2024 yil 22 dekabrdan 31 dekabrgacha amalga oshirilishi kerak. Qonunga ko‘ra, u saylovga 35 kun qolganida boshlanib, 25 kun qolganida tugaydi.

Belarus Markaziy saylov komissiyasi, shuningdek, 2025 yilgi saylov uchun byulletenning shaklini belgilab, matnini tasdiqladi. MSK raisi nomzodlarga tegishli guvohnomalarni topshirdi. Shuningdek, Belarusda prezidentlikka nomzodlarning tele va radio orqali chiqishlari sanasi va vaqtiga qur’a tashlash marosimi bo‘lib o‘tdi. 

Saylovoldi tashviqoti 2025 yilning 1 yanvaridan 25 yanvarigacha davom etadi. Televideniye orqali chiqishlar quyidagi tartibda efirga uzatiladi:

• 9 yanvar – Anna Kanopatskaya, Sergey Sirankov, Aleksandr Xijnyak, Oleg Gaydukevich

• 16 yanvar – Aleksandr Xijnyak, Anna Kanopatskaya, Sergey Sirankov, Oleg Gaydukevich.

Radio orqali chiqishlar quyidagi tartibda efirga uzatiladi:

• 8 yanvar – Oleg Gaydukevich va Aleksandr Xijnyak.

• 10 yanvar – Anna Kanopatskaya va Sergey Sirankov.

• 15 yanvar – Sergey Sirankov va Anna Kanopatskaya.

• 17 yanvar – Oleg Gaydukevich va Aleksandr Xijnyak.

Aleksandr Lukashenko televideniye va radio orqali saylovoldi chiqishlarini rad etdi.

Belarusda prezidentlik saylovlari 2025 yil 26 yanvarga belgilangan.